香港地結婚擺酒閒閒哋都幾十萬，新人為咗場地、人情、圍數搞到頭都大！不過最近內地有對新人就反其道而行，唔揀星級酒店，反而揀咗大家估唔到嘅地方——海底撈！佢哋豪開30圍，宴請足足305個親友，埋單條數仲令全城嘩然，究竟呢場「火鍋婚禮」有幾爆？

嫌傳統婚宴太悶豪開30圍宴請305人

事緣陝西渭南一對新人，新娘高女士大呻傳統婚宴太過沉悶，希望自己嘅婚禮可以開心又自在。佢喺網上見到有人分享海底撈婚禮嘅經歷後，忽發奇想，決定將自己嘅人生大事都搬到火鍋店舉行！婚禮當日，現場筵開30席，足足305名親友到場見證，場面非常熱鬧。為咗令婚禮更完美，佢哋仲請埋婚慶公司負責戶外儀式同流程，而海底撈就主力負責店內佈置同餐飲，分工清晰。

店員驚喜獻花婚禮撞正生日變派對

事件曝光後，大批網民都對海底撈嘅服務讚不絕口！原來婚禮當日，海底撈員工為咗畀新人驚喜，竟然夾道列隊，喺新人進場時逐一送上鮮花，大叫「新婚快樂」，上演一幕溫馨嘅「一路生花」，令新娘感動到眼濕濕。更巧合嘅係，當日原來仲係新娘嘅生日，海底撈員工更加碼著埋公仔衫，同全場賓客一齊唱歌跳舞，將婚宴氣氛推到最高點，成個場就好似一個大型生日派對咁High！

埋單2萬8蚊搞掂雙方家長全力支持

講到最實際嘅開支，呢場30圍嘅婚宴，餐飲費用只係大約2.4萬人民幣（約2.8萬港元），平均每圍唔使一千蚊港紙，喺當地屬於中等消費，但對比起香港嘅天價酒席，真係抵玩到笑！新娘仲大讚海底撈座位夠靈活，有4人、6人、10人枱，可以細心安排親友坐位，避免唔熟嘅賓客同枱食飯勁尷尬。對於呢個咁破格嘅婚禮，雙方家長都非常開明，全力支持，認為只要新人開心就足夠，令呢場創意婚禮得以完美實現。