網傳名單揭示李偉健趙浚承侯雋熙擔正男主角
昨日網上出現一篇疑似「主演更新」的帖文，除了列出原定三位女主角車婉婉、吳若希及李茵彤外，更新增何依婷為第四位女主角。而最受關注的男主角名單終於浮面，分別是「Terry」李偉健、趙浚承及侯雋熙。消息指出，上一輯《愛·回家》的演員陣容中，就只有李偉健一人能夠順利過渡至新劇《愛·回家之三代同糖》，意味著大批觀眾熟悉的角色將全數換血。
趙浚承被查詢未有回應官方亦未正式公布
就網傳男主角名單一事，有傳媒向疑似男主角之一的趙浚承進行查詢，惟截稿前未獲對方回覆。而TVB官方至今亦未正式公布《愛·回家之三代同糖》的完整男主角陣容，令消息真偽仍然存疑。值得留意的是，侯雋熙本身以歌手身份為人熟悉，屬實力唱將，今次若確認參演處境劇將是其演藝事業的新嘗試。
《愛·回家》舊班底大換血僅Terry一人留低
《愛·回家之開心速遞》播出多年累積大量忠實觀眾，劇中不少角色早已深入民心。今次新劇《愛·回家之三代同糖》以「三婆孫」為主軸，由車婉婉、吳若希及李茵彤分別飾演三代女性角色。然而隨著男主角名單曝光，觀眾發現上輯大量人氣角色包括KC、根叔、金城安、大小姐、三太等統統未見蹤影，僅得李偉健一人成功過渡，反映新劇走全新路線的決心。
網民不捨KC離隊質疑新陣容吸引力
消息一出隨即引發網民熱議，留言區幾乎被「KC呢？」洗版。有網民直言「有Terry點可以冇KC」、「Terry同KC由《愛·回家》第一輯做到依家，今次竟然冇咗KC？」，對這對拍檔被拆散感到極度不捨。亦有網民對女主角陣容表示擔憂，留言指「吳若希都唔夠，仲要加多個何依婷」，更有人揚言「冇大小姐、熊尚慈、KC、三太依啲有趣嘅角色，以後慳返半個鐘」。不過亦有支持李偉健的粉絲表示「有Terry我就看」、「Terry做男主角正」，對佢升任男一感到期待。
初出道DaDa認18歲愛趙浚承 短暫戀曲情史重溫
趙浚承同初出道「百果園E神」曾有一輯親密照外洩，照片流出兩人仲各自大方認愛，喺娛圈掀起一陣熱話。
親密照外洩 DaDa毫無掩飾「我哋係拍過拖！」
2010年DaDa憑住傲人E cup事業線同甜美外貌，喺模特兒界同廣告圈急升為宅男女神。正當佢事業一帆風順，網上突然流出多張佢同零人氣組合SQUARE成員Gary（趙俊承）嘅親密照！照片入面，當年21歲嘅趙俊承唔單止攬實DaDa，仲有咀面珠嘅超甜畫面，羡煞旁人！當時記者致電DaDa查詢，佢竟然毫無掩飾，直認：「我哋係拍過拖！」
甩拖兩年短暫復合 分手後仲係朋友
DaDa坦白話，佢同趙俊承喺2007年開始拍拖，雖然唔夠一年就分手，但到2009年又復合過一個月。佢話：「我好念舊，容易同前度翻撻，但同Gary分手係因為性格不合，而家我哋係朋友！」問到會唔會再同趙俊承復合，當年嘅DaDa語氣帶有保留咁答：「佢好孝順，又好錫人！（記者問：有冇懷疑係佢洩密照借你宣傳？）唔會，我信佢唔係咁嘅人！（再有機會復合？）唔知呀……」雖然DaDa話分手後做番朋友，但佢對趙俊承嘅讚賞同保留態度，已經畀外界無限遐想！
趙俊承回應：驚到呆晒！
相對於DaDa嘅爽快，趙俊承喺2010年7月28日一場首映禮上被問到親密照時，表現就略為失措！當時記者拎出照片追問趙俊承，佢先係呆咗幾秒，先傻笑回應：「……我同佢幾年前做模特兒時一齊，拍咗半年左右就分咗。佢係好女仔，但嗰時我哋重細，我唔識珍惜。」問到分手原因，趙俊承話係和平分手，但暗示DaDa嗰時比較貪玩：「佢唔係成日蒲，但有時會出去玩。我太關心佢，佢覺得我管得太多，咪分手囉！」
趙俊承急澄清：影床照嗰個唔係我！
講到復合可能性，趙俊承話：「佢人靚又好女，唔排除有機會！不過我而家專注事業。」趙俊承仲急急澄清：「同DaDa影床照嗰個唔係我呀！」似乎生怕畀人誤會同DaDa當年嘅床照風波扯上關係。雖然趙俊承當時人氣麻麻，但佢對DaDa嘅讚美同唔排除復合嘅口風，的確無損佢嘅暖男特質。
DaDa事業旺 收入秒殺Gary
2010年DaDa同陳柏宇拍過百果園廣告，可惜當時形象太密實未有突破。直到同年3月轉簽模特兒公司，走性感路線後，佢即刻job接job，事業如日中天！相反，趙俊承所在嘅男團SQUARE雖然未解散，但工作量少得可憐，四位成員半年總收入加起來，都唔夠DaDa三個月嘅收入！有傳DaDa當時收入比趙俊承高出100倍，難怪被指「女神啜奀星」！
08男團SQUARE 港版飛輪海出道即沉寂
講到SQUARE，呢個2008年出道嘅四人男子組合，有「港版飛輪海」之稱，由何尚謙（James）、趙俊承（Gary）、何浚尉（Rex）同李柏煥（Brian）組成，係江若琳嘅師弟。雖然出過一張專輯，但出道3年，唔單止四位成員連名字都未畀人記熟，甚至連組合名都無乜人聽過，工作量低到近乎零人氣，喺娛圈可謂「邊緣化」嘅代表。
