動森殺入Baskin-Robbins！粉絲必搶豆狸匙羹扣＋幽幽冰袋最貴一款盛惠3,900円！

《動物森友會》（動森）的粉絲注意！繼早前與《勇者鬥惡龍》聯乘後，日本Baskin-Robbins又有新搞作，今次竟然搵嚟任天堂旗下人氣爆燈的《動物森友會》合作，推出一系列限定雪糕、新地及精品，由7月1日開賣，期間限定一個月！各位身在日本或者準備去日本旅行的動森粉絲，睇怕今次荷包又要大出血了！

動森主題雪糕＋新地列陣！必搶豆狸匙羹扣＋幽幽冰袋

今次聯乘誠意十足，Baskin-Robbins特別為動森設計了一款全新口味雪糕「動物森友會夏日島嶼饗宴」，混合了梨、蘋果和波子汽水味雪糕，分別代表遊戲中的森林、沙灘和海洋，裡面更有糖果魚仔，單球盛惠420円。不過，最吸引粉絲眼球的絕對是各款限定精品！凡惠顧「Nook Inc. 特別雙球杯」（細杯680円／普通930円），即可獲贈超可愛的豆狸與粒狸橡膠匙羹扣！另外，售價1,350円的「夜間島嶼雙球新地」，除了有兩球雪糕、星星朱古力及金平糖外，更附送一個可重複使用的「幽幽」造型冰袋，夏天用來為便當保冷一流，粉絲必搶！

粉絲荷包大出血預警！限定鈴錢袋＋主題雪糕蛋糕登場

以為咁就完？少年你太年輕了！想將成個島搬返屋企，仲有多款選擇。當中包括盛惠820円的「禮物盒單球新地」，附送K.K.及西施惠的塑膠公仔，食完個盒仲可以重用；另外亦有以呂遊為主題的「呂遊漂流梳打」（620円）。如果想同朋友分享，可以考慮外賣系列，最矚目的莫過於「動物森友會特別套裝」，內有8球雪糕再加一個遊戲內的鈴錢袋，細杯裝3,000円，普通裝3,500円。而壓軸登場的，就是索價3,900円的「動物森友會雪糕蛋糕」，睇見都唔捨得食！