又到畢業求職旺季，唔少社會新鮮人（Fresh Grad）都磨拳擦掌，希望搵到份心儀好工，踏出職涯第一步。不過理想同現實總有距離，最近就有位Fresh Grad喺網上大呻，分享自己求職期間嘅慘痛領悟，直言對一件事感到極之後悔，更發文詢問：「第一次搵工，最後悔冇提早做啲咩？」結果引發大批網民圍爐取暖，留言瞬間洗版！
Fresh Grad大呻搵工中伏！驚覺大學生活原來要及早鋪路
事主大呻，佢以前天真地以為搵工淨係需要準備好份履歷，收到面試通知先再臨急抱佛腳準備自我介紹就得，完全冇諗過要為求職做長遠規劃。點知一開始Send CV同見工，就即刻「中伏」，發現企業睇重嘅各種能力同經驗，全部都係要長時間累積，根本冇得速成。佢回望自己嘅大學生涯，無論係打工、上莊、搞Project定做報告，原來全部都可以係履歷上嘅「沙紙」，而家最大嘅焦慮就係：「如果一早準備，就唔使行咁多冤枉路！」
網民洗版式圍爐取暖！齊指1項必備神技冇學到超有感
事件曝光後，大批網民替事主不值之餘，亦紛紛分享自己嘅慘痛經歷。喺眾多留言之中，被提及最多次嘅答案竟然只係簡單3個字：「讀英文」！呢個答案一出，即刻引嚟海量附和，唔少過來人鬧爆自己當年唔爭氣，大呻「超有感」、「真係太重要」。另外，亦有好多人後悔大學時期冇好好讀書，坦言「書到用時方恨少」，感嘆雖然學歷唔代表一切，但「好多時就係入場券」，後悔當初冇努力讀書或者繼續進修。
過來人分享職場生存法則！提醒Fresh Grad連外表都係競爭力
除咗學業同語言能力，一眾網民仲從唔同角度提出建議。有人強調學生時期應該「越早確定志向越好」，預先考定相關證書同專業技能。亦有人後悔當年掛住返Part-time，如果將時間用嚟參加比賽、搞Project或者多啲參與校內活動，履歷表肯定會更加豐富。更令人意想不到嘅係，有網民提到原來外在形象都係重要嘅競爭力，直言面試前會做啲基礎醫美保養，呢個睇法竟然都獲得唔少人認同，睇嚟Fresh Grad要突圍而出真係唔簡單！
