有養貓嘅朋友都知，貓主子平時睇落毛茸茸好似好大隻，但一沖涼濕水，啲毛一貼實個身，就會即刻「縮水」打回原形，暴露出纖瘦身材。不過，凡事總有例外！最近網上瘋傳一段影片，有隻橘貓竟然完全顛覆呢個定律，沖涼後體型絲毫不變，更因為一把驚人靚聲而爆紅！
港產實心橘貓沖涼挑戰地心吸力
有位飼主分享幫屋企隻橘色英國短毛貓沖涼嘅日常影片。從片中可見，當溫水一淋落貓貓身上，啲毛髮雖然濕晒緊貼肌膚，但佢嘅身形竟然同乾爽嗰陣一模一樣，依然保持住豐滿圓潤、肉感十足嘅完美曲線，完全冇「縮水」跡象！飼主都忍唔住笑稱自己隻愛貓係「實心橘貓」，真材實料，唔係虛胖！
影片瘋傳百萬人朝聖留言區被洗版
呢段「實心橘貓」沖涼片一出，即刻喺社交平台被瘋傳，吸引超過百萬人次觀看！大批網民睇到O嘴，紛紛湧入留言區洗版，個個都笑到肚痛：「我第一次睇到沖涼後唔會瘦嘅貓咪」、「很少看到有貓澆了水還像貓的」、「紮紮實實的沖水聲」，更有人抵死地話：「佢冇虛胖，佢係真係胖！」
超低音炮叫聲震撼全網民驚呼合理
不過，成條片最爆嘅亮點，絕對係貓貓把聲！正當大家以為佢會發出可憐嘅喵喵聲時，呢隻「實心橘貓」竟然一嘢轉個頭望實鏡頭，發出一聲極度低沉、渾厚又有共鳴嘅「嗷」！呢把聲完全唔似平時啲貓，反而好似重型貨車行駛時嘅震撼鳴笛，強勁嘅低音炮效果嚇親唔少人。網民聽完之後反而覺得好合理，笑爆留言：「呢架貨車做咩突然響按？」、「呢個噸位配呢把聲完全合理」、「連把聲都中氣十足！」
