日本街頭臥虎藏龍，高手往往在民間！東京新宿車站一位夜班保安阿伯，竟然憑住一卷普通封箱膠紙同美工刀，喺20年間征服全日本設計界，連Nike、任天堂都要排隊求佢合作！呢位從未受過正統美術訓練嘅草根設計師，究竟點樣由一個普通保安，搖身一變成為近年日本最矚目嘅設計傳奇？

20年前車站迷宮迫出靈感獨創修悅體安撫乘客

故事要由2004年講起，當時新宿車站正進行大規模擴建工程，站內好似迷宮一樣，每日都有大量乘客迷路。當時擔任引導員嘅佐藤修悅，起初嘗試用大聲公引導人流，但效果極差，幾乎無人理會。情急之下，佢忽發奇想，利用地盤剩下嘅封箱膠紙，親手製作方向指示牌。佢唔打草稿，直接用膠紙鋪出格線，再以美工刀雕刻出字形。佢更刻意將字體邊角修得圓潤，希望可以舒緩乘客喺複雜車站中嘅煩躁感。呢款獨一無二、充滿溫度嘅字體，後來被粉絲自發命名為「修悅體」（Shuetsu-tai），迅速喺網絡爆紅。

網民激讚設計界頒發白金獎Nike任天堂爭相聯名

「修悅體」憑住獨特嘅懷舊復古未來感，加上極高嘅辨識度，好快就引起全日本關注，網民激讚「睇見都覺得治癒」！佐藤修悅嘅才華終於喺2025年獲得官方肯定，獲日本標識設計協會（SDA）頒授白金榮譽獎，表揚佢過去20年對公共指示設計嘅貢獻。各大品牌亦聞風而至，2026年4月10日開幕嘅Nike新宿4層高旗艦店，店外巨大嘅Logo正係出自佢手筆，由佢親手用膠紙製作後再作數碼化。之後，任天堂同三得利亦相繼邀請佢為品牌設計字體，商業委託絡繹不絕！

爆紅後收費竟只要求一個飯盒堅持只用膠紙創作超有性格

成為炙手可熱嘅設計師後，佐藤修悅嘅身價理應水漲船高，但佢嘅堅持卻令所有人大跌眼鏡！原來佢從不為自己嘅作品定下固定收費，酬勞全由客戶自行決定。佢唯一嘅要求，就係委託方要提供一個便當同車資，並且堅持只用封箱膠紙創作。佢笑言自己有時會沉迷創作到廢寢忘餐，對佢嚟講，能夠做自己鍾意嘅事並獲得大家認可，已經係最大嘅幸福，呢種職人精神實在令人敬佩！