榴槤貴為「水果之王」，果肉香甜軟糯，令一眾粉絲為之瘋狂。不過其價錢始終唔算親民，唔少人連買一舊都要諗過度過。但你敢唔敢相信，竟然有人奢侈到將A級榴槤當飼料，仲要係用嚟餵羊？近日河北就有農戶因為呢個「豪氣」舉動而喺網上爆紅，成件事嘅後續發展仲令唔少人嘖嘖稱奇！

河北農戶揭秘A級榴槤餵羊真相

事件主角係河北邢台一位經營水果零售生意嘅趙先生。佢向傳媒大呻，平日入貨嘅泰國A級榴槤，雖然每斤售價高達26元人民幣（約30港元），但每次入貨150至200箱，總會遇到部分破損、未熟或者唔會熟嘅「啞果」，呢啲次貨根本賣唔出。為免浪費，佢索性將呢啲榴槤全部用嚟餵飼家中嘅30多隻羊。佢透露，呢個做法已經持續咗足足2年，每星期會餵2至3次，除咗榴槤，有時都會將過期嘅西瓜、香蕉等水果當作「加餐」，相當闊綽！

事件曝光後網民洗版高呼想做羊

事件喺網上曝光後，大批網民替羊群嘅「超豪伙食」感到震驚，隨即引發洗版式討論！唔少人搞笑留言，話啲羊實現咗人類夢寐以求嘅「榴槤自由」，紛紛表示「從來沒這麼想當羊」、「比大多數人都吃得好了」。有網民更抵死地表示，呢啲羊嘅生活質素分分鐘高過自己，簡直係「人不如羊」嘅最佳寫照，場面非常搞笑。

驚人轉折羊肉變清甜兼無羊羶味

最令人意想不到嘅係，趙先生表示用榴槤餵羊2年後，竟然有驚人發現！佢形容，長期食榴槤同水果嘅羊，羊肉肉質竟然變得「清甜」，而且幾乎完全冇晒平時嗰股勁重嘅羊羶味。佢話呢啲「榴槤羊」多數都係留返自己食，但如果咁啱有鄰居或顧客撞到佢宰羊，佢都會以每斤50元人民幣（約58港元）嘅價錢出售。有網民即刻計過數，話50蚊雖然買唔到一斤靚榴槤，但竟然買到一斤「榴槤羊肉」，聽落都覺得非常吸引！