工人斬樹驚見樹樁藏「兩團白波」！近睇嚇親原來係活物 結局超暖心

斬開枯樹驚見兩團毛波波原來係貓頭鷹BB

事發喺美國佛羅里達州，有屋主因為後院棵樹枯死咗，就請工人嚟幫手斬走。點知工人鋸到一半，發現樹幹中間原來係空心嘅，仲有兩團白色毛茸茸嘅「小白球」喺入面！眾人初時都唔知係咩，鼓起勇氣行近啲睇，先發現竟然係兩隻啱啱出世、眼都未開嘅貓頭鷹BB！原來呢個枯樹窿就係佢哋嘅安樂窩，但就咁樣被人類無情情摧毀咗。

救援中心介入惜母鳥無影無蹤BB慘變孤兒

事件曝光後，兩隻可憐嘅貓頭鷹BB即刻被送到當地嘅野生動物救援中心。職員檢查後好彩佢哋冇受傷，推斷佢哋只係出世幾日。為咗畀BB一個完整嘅家，職員決定幫佢哋搵返媽媽，專登喺屋主後院另一棵樹上整個木箱，將BB放返入去，仲播貓頭鷹叫聲，希望吸引貓頭鷹媽媽返嚟。可惜，等到第二日，現場都完全冇母鳥返嚟探過嘅痕跡，兩隻BB慘變孤兒。

中心悉心照料數月毛球BB暴風成長變小帥哥

雖然搵唔返媽媽，但好在仲有救援中心嘅有心人。職員只好將兩隻幼鳥帶返中心親手照顧。經過幾個月嘅悉心照料，當初兩團弱小嘅「毛球」，已經暴風成長，蛻變成英氣十足嘅青少年貓頭鷹！中心表示，會等佢哋學識獨立生存技能之後，就安排佢哋野放，等佢哋可以真正重返大自然嘅家。