凌晨1點耳內突傳巨響！大學生戴$70藍芽耳機瞓覺出事 廠商回應惹網民鬧爆

事主深夜刷片突感耳鳴灼燒感室友誤以為手機跌落地

事主孫同學憶述，事發在凌晨1點左右，當時宿舍已熄燈，他如常戴住藍芽耳機「碌」手機睇片。點知大約一個鐘後，右邊耳機突然「嘭」一聲發生爆炸！爆炸聲響之大，連室友都驚醒，仲以為係有人手機跌落地。事主當下只感到耳鳴同灼燒感，嚇得佢即刻求醫。好彩第二日去醫院檢查後，醫生話佢耳膜完好，聽力無受損，算係不幸中之大幸。孫同學強調，呢款耳機係佢用約70蚊人仔買入，已經正常使用超過一年，喺主流網購平台銷量高達幾百萬副，絕對唔係平價雜牌，爆炸前亦無任何發熱或怪聲等先兆。

網民鬧爆70蚊點會唔係雜牌更有人質疑事主自己壓壞

事件曝光後，大批網民並唔同情事主，反而群起質疑！唔少人鬧爆：「70蚊雞嘅耳機唔係雜牌係咩？」、「銷量100多萬，唔代表佢唔係雜牌」、「幾十蚊嘅嘢，應該係雜牌啦」。亦有網民錯重點，溫馨提示：「大佬，可唔可以瞓覺唔好戴耳機，時間長咗耳朵濕熱會發炎㗎」。更有網民化身偵探，質疑事件真偽：「自己壓壞咗話爆炸啫，耳機粒電芯咁細，真係爆咗就唔係咁簡單啦」、「唔係雜牌咁點解唔開名？」

廠商要求寄回檢測再賠償事主最後決定放棄追究

事主事後有聯絡耳機廠商，對方表示可以將爆炸嘅耳機寄返去檢測，如果鑑定後證實係產品質量問題，就會承擔相關嘅醫療檢查費用。不過，孫同學表示後續唔會再追究，亦唔打算對外公開涉事嘅耳機品牌。呢個決定令唔少網民大感錯愕，認為佢應該公開品牌，以免再有下一個受害者，但事主堅持「唔搞咁多嘢」，事件亦就此告一段落。