港人返鄉下（去日本）最愛行程，必定包括掃勻各大便利店美食！Lawson、FamilyMart、7-Eleven各有捧場客，而7-Eleven最近又有新搞作，推出一系列超犯規的綠茶新品，其中一款「綠茶飯糰」更在網上引爆熱議，不少準備去日本的旅客已將其列入必食清單，但原來想食都唔係咁易，隨時去錯地方「食白果」！

靜岡7-11癲覆想像！一番茶製「綠茶飯糰」挑戰味蕾極限

講起日本綠茶，大家可能即刻諗起京都宇治，但原來日本綠茶產量第一嘅地方係靜岡縣！今次7-Eleven就同靜岡縣聯手，採用最頂級、每年首次採摘的「一番茶」茶葉，推出多款限定美食。當中討論度最高的，絕對是外型超衝擊的「靜岡茶葉飯糰」！飯糰將原片茶葉混入米飯，再加入海苔和鰹魚，完美還原日式茶泡飯風味，啖啖都係濃郁茶香。同系列仲有「綠茶忌廉泡芙」、「葛餅銅鑼燒」、「綠茶朱古力丹麥酥」等，款款都落足重本，綠茶控見到肯定會失心瘋！

旅客注意！超殘酷發售方式曝光想食都冇份

事件曝光後，隨即洗版各大旅遊群組，因為今次7-Eleven的發售方式極度「殘酷」！原來，為了支持靜岡縣本地農業，飯糰及大部分日式甜品都屬於「地區限定」，只有在靜岡縣內的7-Eleven分店先搵得到！換言之，就算你去齊東京、大阪、福岡，甚至特登去京都朝聖，都注定會撲個空！不少網民大呻：「去錯地方咪冇得食？」、「專登去京都搵咪好笨？」、「7仔今次玩得好絕！」

想食要飛轉靜岡！地區限定背後原因竟超暖心

雖然發售方式令不少旅客大感失望，但原來背後原因超暖心。7-Eleven表示，此舉是為了支持小型農戶，並推廣本地種植的農產品。所以各位想一嚐這款「幻之飯糰」的朋友，下次計劃日本行程時，記得要將靜岡縣加入目的地清單了！提提大家，部分西式甜品（丹麥酥及蛋糕）在鄰近的山梨縣都有售，但想試勻全系列，就一定要親身去一轉靜岡縣朝聖喇！