日本聯乘商品一向都極具創意，每次推出都引發搶購潮，但今次呢款「神級聯乘」產品，瘋搶程度絕對是前所未見！為慶祝經典遊戲《勇者鬥惡龍》（Dragon Quest）誕生40週年，日本樂敦製藥（Rohto）再度合作，推出一款限定眼藥水，其超萌造型令一眾粉絲完全失控，開賣不足一日就宣告全線售罄，想買都買唔到！

DQ 40週年神級聯乘！16ml加大版史萊姆王眼藥水登場即掀搶購潮

今次聯乘主角，正係《勇者鬥惡龍》入面極具人氣嘅「史萊姆王」！呢款於6月10日正式發售嘅「樂敦Z! 史萊姆王眼藥水」，樽身完美還原史萊姆王嘅皇冠造型，可愛度爆燈。為咗配合史萊姆王識得用冰系魔法嘅設定，眼藥水亦主打強勁清涼感，仲細心分咗三種等級，分別對應遊戲中嘅初階、中階及高階冰系咒文。更佛心嘅係，容量仲由普通版嘅12ml「增量」到16ml，加上包裝上滿滿嘅遊戲彩蛋，難怪一眾DQ忠實粉絲誓要將佢入手！

開賣不足24小時全線售罄！粉絲哀嚎炒家網上非法兜售

正當大家以為6月10日準時去搶購就萬無一失，點知現實比想像中更殘酷！呢款神級眼藥水實在太受歡迎，唔少店舖喺正式發售日前已經偷步上架，結果導致產品喺開賣當日結束前，已經被掃得一乾二淨，全日本陷入「一滴難求」嘅瘋狂狀態！大批粉絲喺網上哀嚎遍野，表示完全買唔到。與此同時，有炒家睇準商機，即刻將戰利品放上二手買賣平台Mercari，企圖以天價轉售圖利，食盡人血饅頭！

劇情神反轉！平台極速下架兼犯法隨時被捕下場曝光

正當粉絲們鬧爆炒家行為可恥之際，劇情竟然出現神反轉！二手平台Mercari極速採取行動，將所有相關嘅史萊姆王眼藥水商品強制下架。原來根據日本《藥品和醫療器械法》，任何未持有許可證嘅人士，一律禁止銷售醫藥品，炒賣眼藥水本身就係違法行為，隨時會被逮捕！平台執法極為嚴格，連空樽、空盒嘅賣場都一併剷除。如今呢款眼藥水已成為傳說級稀有品，入手難度堪比喺遊戲中遇到「金屬史萊姆王」，真係可遇不可求！