夏天最怕同陽光玩遊戲，但更怕夜晚去公園散步被蚊蟲大軍瘋狂攻擊！尤其係天生「招蚊體質」嘅朋友，每次出街都變成「人肉捕蚊燈」，雙腳紅腫返屋企，真係慘過返工。不過，最近內地一個公園就因為「幾乎無蚊」而喺網上爆紅，據聞全靠一部滅蚊神器，單日可以狂吸2萬隻蚊，究竟係咪真係咁犀利？

杭州公園引入55部滅蚊神器實測2小時狂吸過百隻

事緣喺浙江杭州一個鄰近濕地嘅「蔣村十字港公園」，以往都係蚊患重災區。為咗解決問題，當地自去年起就引入咗55部名為「吞天蛙」嘅智能捕蚊機，單單呢個公園就裝咗39部！呢部機號稱可以模擬人體呼吸釋放二氧化碳，再配合溫度同氣味引誘蚊蟲，然後用強力風機將佢哋「吸入」機內。有民眾專登去實測，發現短短2個鐘，3部機就成功捕捉咗116隻蚊！公園內嘅大型數據板更顯示，當日下午累計捕獲嘅蚊蟲數量已超過7,000隻，戰績相當驚人！

「招蚊體質」居民親身實測大讚以前完全不能接受

事件曝光後，大批網民替當地居民高興，唔少人更親身到場感受。一位21歲鄭姓男士大呻，自己喺公園坐足個半鐘，真係一啖都無被蚊針，大讚服務貼心。而另一位住喺附近、自認係「招蚊體質」嘅李先生就更加感觸，佢話：「以前喺公園裏完全不能接受，被咬得很嚴重」，每次落公園都一定要著長褲。但自從裝咗呢批滅蚊神器後，情況明顯改善，雖然唔係100%無蚊，但已經係「可以接受」嘅程度，令一眾朋友都嘖嘖稱奇。

物理捕蚊獲激讚網民關注能否引入香港杜絕蚊患

呢種純物理嘅滅蚊方式，唔單止效果顯著，仲可以大大減少使用化學殺蟲劑，對環境同濕地生態都更加友善，因而獲得網民一致激讚。唔少人睇到眼紅紅，紛紛留言「香港幾時先有」、「康文署學下嘢啦」、「夏天去郊野公園必備」。隨著天氣越嚟越熱，蚊蟲問題日益嚴重，好多人都關注呢類智能捕蚊系統，係咪可以推廣到香港更多公園同公共空間，等大家都可以過返個無蚊嘅夏天！