養寵物最怕就係佢哋變身「拆屋專家」，尤其係返工返到一半，打開屋企個Cam，見到心愛嘅毛孩正喺度「犯案」，真係個心都離一離！最近美國一位女飼主就經歷咗呢個驚心動魄嘅時刻，佢半夜開Cam諗住捉拿愛犬咬拖鞋嘅罪證，點知鏡頭拍到嘅畫面，唔單止令佢鬧唔出口，仲心痛到差啲喊出嚟，結局180度大反轉！
半夜直擊愛犬偷拖鞋準備開聲鬧爆結局神反轉
事主雷茲爾（Leizle）因為工作需要上夜班，屋企隻米格魯「芬奇」（Finch）就成為佢最大嘅牽掛。嗰晚佢如常打開寵物監視器，就見到芬奇鬼鬼祟祟咁叼住自己一隻拖鞋喺客廳行嚟行去。雷茲爾當下第一個反應就係「死啦！又準備咬爛嘢！」，仲已經準備好透過Cam嘅對講功能大喝「NO！」去制止佢。點知，芬奇嘅下一個舉動，竟然令佢瞬間打消所有責備嘅念頭。原來芬奇並冇咬隻拖鞋，而係小心翼翼咁將拖鞋叼上梳化，然後蜷縮身體，將拖鞋當成枕頭咁攬住瞓覺，場面令人心軟。
主人睇到心都酸埋原來狗狗嘅愛係咁純粹
事件曝光後，大批網民都話睇到眼濕濕！雷茲爾見到呢一幕，當堂心都酸埋，佢感性咁話，嗰一刻先發現，原來狗狗對主人嘅愛可以咁純粹。佢解釋，雖然當時老公都喺屋企，但芬奇明顯仍然極度依戀自己，彷彿要聞住「媽媽」陣味，先可以填補深夜冇人陪嘅不安感。呢種無聲嘅思念，比起任何破壞都更加令人心痛，亦令無數狗主產生強烈共鳴，紛紛表示「我隻狗都係咁」、「真係會睇到喊」。
專家解畫毛孩戀主氣味或為表達極度思念
其實芬奇嘅行為並唔係單一例子。有專家就解釋，狗狗嘅嗅覺非常靈敏，主人皮膚分泌出嚟嘅皮脂同汗水，對佢哋嚟講係最熟悉、最有安全感嘅氣味。所以，當毛孩鍾意捐入你堆髒衫、或者叼走你隻拖鞋去瞓覺，未必只係為咗曳，好可能係佢哋用自己嘅方式去表達思念同依賴。下次再見到寵物攬住你啲私人物品，不妨先唔好急住鬧，因為呢個可能係佢哋無聲咁同你講：「我好掛住你呀！」
