各位FF、DQ、鋼鍊迷注意！銀包準備大出血啦！日本遊戲巨頭Square Enix官方Cafe即將於6月12日在東京新宿正式開幕，一次過晒冷旗下四大神級IP，包括《Final Fantasy》、《勇者鬥惡龍》、《尼爾：自動人形》同《鋼之鍊金術師》，由主食、甜品到飲品都充滿巧思，粉絲們準備好去朝聖未？

必食推介2B小姐姐沙律史萊姆甜品

今次Menu絕對誠意十足，誓要榨乾粉絲荷包！《Final Fantasy》系列有超可愛嘅陸行鳥漢堡、仙人掌迷你包，甜品仲有FF版布甸芭菲，上面有隻棉花糖陸行鳥，點捨得食！《勇者鬥惡龍》粉絲就可以挑戰史萊姆造型嘅甜品同漢堡，當中「Healslime」漢堡仲神還原觸手，夠晒過癮！而《尼爾》fans就更加唔可以錯過，超抽象嘅「2B小姐姐裙底風」可麗餅沙律，同埋「現場採購彈幕」意粉，睇怕食一啖都會諗起被彈幕追殺嘅回憶！

粉絲瘋搶限定杯墊隨機抽勁睇彩數

事件曝光後，大批粉絲已在網上瘋狂洗版，尤其對Cafe嘅周邊精品虎視眈眈！除咗食物有心思，飲品同贈品先係戲肉！高級飲品有FF嘅「Potion」、DQ嘅「旅人之回復藥草」，打卡一流！而普通冷熱飲品都會附送杯套或超靚嘅拉花。最重要係，每點一款主題食物或高級飲品，就可以隨機獲贈一張限定杯墊，而每位客人亦可獲贈一款主題餐墊，款式同樣係隨機抽，想儲齊一套真係要睇彩數同荷包深度！

朝聖前必睇入場費每位硬食1200円

不過大家出發朝聖前要留意，Cafe設有每人1,200円（約7.6美元）嘅服務費，堪稱「入場最低消費」！好彩呢個價錢已包含一杯標準飲品同埋一張隨機餐墊，都算係咁。至於其他主食價錢大約喺1,500至2,200円之間，而甜品同高級飲品就介乎1,000至1,500円。Cafe雖然接受即場walk-in，但想確保有位就最好經官網預約喇！