夏天為大地帶來美腿，亦都帶來可惡嘅蚊！相信唔少人都試過深夜被蚊「嗡嗡聲」搞到無覺好瞓，被咬到周身痕癢更是家常便飯。不過，大家嘅反應最多都係嬲爆拍死隻蚊就算，但最近廣東有位仁兄，竟然被蚊激到精神崩潰，採取咗一個極度瘋狂嘅報復手段，過程被放上網後，令全體網民睇到O晒嘴！

廣東男被蚊激到崩潰竟自製一本蚊子生死簿

事件主角係一位廣東男子，佢長年飽受蚊患困擾，尤其一到夏天，簡直係佢嘅「深夜惡夢」。可能係積怨太深，有一日佢終於忍唔住大爆發，突發奇想決定要為佢嘅「戰績」留個記錄。佢唔再係簡單地打死蚊子就算，而係將每一隻被佢擊殺嘅蚊子屍體，小心翼翼咁收集起嚟，仲好似整標本咁，逐隻逐隻用膠紙黏貼喺一本簿上面，甚至喺旁邊鉅細無遺咁標明每一隻蚊嘅「死亡日期」，整成一本獨一無二、令人啼笑皆非嘅「蚊子生死簿」！

影片瘋傳網民笑爆留言稱係蚊子界滅門慘案

呢本充滿怨念嘅「生死簿」影片一曝光，即刻喺網上被瘋傳，引嚟大批網民圍觀。大家睇完都忍唔住爆笑，紛紛留言調侃事主嘅創意同執念：「蚊子嘅族譜直接被你滅門」、「呢位仁兄係咪被蚊咬到有心理陰影」、「原來人被蚊子逼急咗，真係咩都做得出！」更有網民抵死地話，呢本簿應該要「列入蚊子界禁書」，笑稱「每一頁都係深夜被叮醒嘅怨念」。

蚊子標本密密麻麻超強儀式感被封為戰功簿

從影片截圖可以見到，呢本「生死簿」製作極度認真，雖然唔少蚊已經被壓成薄片，但事主依然好有心機咁將佢哋逐一固定保存。整本冊子密密麻麻貼滿蚊屍，畫面既荒謬又充滿「儀式感」，令網民大讚呢本根本就係一本「戰功簿」，完美展示出人類同蚊子之間嘅血海深仇。有網民更幽默表示，呢啲唔係蚊屍，而係「青春留下的散蚊詩」，實在令人哭笑不得。