松屋牛肉飯變天？銀座驚現「豪華版」神戶牛丼索價近$70！比平民版貴足3倍

去日本旅行，想食平靚正醫肚，相信唔少人都會揀連鎖牛肉飯專門店「松屋」！一碗牛肉飯盛惠460円（約HK$23），絕對係唔少旅人的窮遊恩物。不過，最近松屋竟然大變天，喺東京銀座開咗間「豪華版」，一碗牛肉飯竟然索價近$70，比平民版貴足3倍，究竟係咩玩法？

銀座松屋百貨限定！神戶牛丼索價1390円貴足3倍

原來，今次係一個美麗的誤會！日本除了有平民牛肉飯連鎖店「松屋」，亦有一間完全無關、主打高檔路線的「松屋百貨」。兩間公司決定Crossover玩聯乘，喺銀座松屋百貨地庫食品層，開設一間永久的「Premium Matsuya」！主打外賣自取，餐牌同普通松屋完全唔同，走超豪華路線。招牌菜「神戶牛丼」用上頂級神戶牛肉，盛惠1,390円（約HK$70），足足係普通版嘅3倍價錢！另外仲有國產黑毛和牛漢堡扒便當（1,681円，約HK$84）、豚肉扒便當（1,681円，約HK$84）等，價錢絕對唔平民！

豪華便當索價逾$80！網民熱議：當遊客係水魚？

事件曝光後，隨即引發網上熱議！唔少人都好奇，平時食開幾十蚊碗牛肉飯，突然要畀貴幾倍嘅價錢，究竟有冇人會買單？「賣到咁貴，係咪當人水魚？」、「去得銀座嘅有錢人，會唔會食松屋㗎？」正當大家議論紛紛之際，有消息指，原來「Premium Matsuya」去年曾以期間限定店形式喺同一地點試業，當時食客反應竟然超乎想像，大受歡迎，證明貴價版一樣有市場！