金毛尋回犬叼『神秘禮物』返屋企主人初時唔為意行近一睇嚇到O嘴：竟然識郁？

養寵物有時真係好似湊仔，總有估你唔到嘅驚嚇位！美國有位主人最近就分享咗屋企隻金毛尋回犬嘅「驚人創舉」，以為狗狗乖乖哋喺口度叼住啲咩，點知行近一睇，竟然係識郁嘅「活體禮物」，嚇到佢當場O嘴，事件喺網上曝光後更引發網民洗版式討論！

主人以為叼襪返屋企點知係活生生兔仔餐枱底亂跳嚇到傻

事主艾比（Abby Green）喺社交平台大呻，話屋企隻金毛尋回犬瑪雅（Maya）唔知幾時開始有個「特別癖好」，就係好鍾意由戶外叼啲「戰利品」返屋企。有一日，艾比見到瑪雅又叼住舊嘢，初時以為只係小朋友嘅襪，完全冇為意。點知過咗一陣，嗰隻「襪」竟然喺餐枱底自己跳下跳下，艾比定神一睇，先驚覺係一隻活生生嘅兔仔BB！影片所見，兔仔喺枱底探索，而「犯人」瑪雅就坐喺側邊，擺出一副「我冇做錯」嘅無辜樣，似乎想扮傻逃過主人嘅追問，場面真係令人哭笑不得！

事件曝光網民群起洗版唔鬧反撐：狗狗想養自己嘅寵物

事件曝光後，大批網民非但冇責怪瑪雅，反而被佢嘅萌樣徹底融化，紛紛留言替佢開脫！網民群起洗版，笑爆話「狗狗只係想養返隻寵物啫」、「你隻狗根本係迪士尼公主」、「唔好怪瑪雅啦，快啲收養呢啲兔仔BB啦」。更加有唔少「過來人」飼主表示身同感受，留言指「我屋企隻阿金都係咁，成日帶兔仔返屋企」，睇嚟金毛尋回犬帶兔仔返屋企，可能係佢哋族群嘅神秘傳統！