返工放工無限輪迴，相信唔少打工仔都想發展副業，賺多份錢傍身之餘，更希望將興趣變成事業！最近美國紐約就有一位28歲工程師，因為太鍾意狗狗，竟然將「遛狗」發展成超賺錢副業，每月額外勁賺超過6,000美元（約4.7萬港元），收入隨時多過正職，究竟佢係點做到？

清晨午休放工直踩！揭秘工程師超狂時間表

事主Coby Goodhart本身係一位全職工程師，但為咗追尋同狗狗相處嘅夢想，佢嘅時間表可以話係「用到盡」！佢喺2023年創立自家遛狗品牌「Goodhart Dog Co.」，為咗兼顧正職，佢每日天未光就要起身，趕喺返工前完成第一輪遛狗；到咗午飯時間，人哋食飯佢就去放狗；收工後仲要繼續接單，連週末都冇得休息！更誇張嘅係，為咗喺自己返工時段都能夠提供服務，佢甚至另外請咗個員工幫手，真係將時間管理發揮到極致！

唔係周街行下就算！公開高端服務成功關鍵

想知點解佢可以突圍而出，收費仲要唔平？原來秘訣在於佢將服務定位為「高端市場」。Coby坦言，佢嘅目標唔係服務所有人，而係專注提供高品質、高信任感嘅遛狗同照顧服務。佢會親自去社區大廈向管理員派卡片，靠口碑一個傳一個累積客戶。收費方面亦會根據狗狗嘅體型、性格、地點同照顧需求再作調整，務求令狗主覺得錢花得值得，可以安心將「主子」交託畀佢。

月賺4萬7蚊唔係夢！副業隨時變全職事業

呢份睇落辛苦嘅副業，回報絕對超乎想像！Coby透露，如今「Goodhart Dog Co.」每月為佢帶嚟超過6,000美元（約4.7萬港元）嘅可觀收入，年收入更已衝破6位數美金！雖然要日曬雨淋，甚至喺紐約嚴冬嘅凌晨捱凍出動，但佢認為最珍貴嘅唔係錢，而係得到狗主信任，以及同狗狗相處嘅快樂時光。佢更表示，希望未來可以將呢盤副業，真正發展成自己嘅全職事業！