日本旅行注意！福島最近人心惶惶，事關當地驚現一隻「高智商黑熊」，唔單止喺市區橫衝直撞，更連環襲擊市民，搞到4人受傷！最恐怖嘅係，呢隻熊唔係普通野獸，佢之後嘅一連串「神操作」簡直嚇呆全日本，連市長都O晒嘴，究竟發生咩事？

黑熊連環襲擊4人浴血獵人圍捕反被神級操作KO

事發喺星期二，一隻黑熊突然闖入福島市一間工廠，不由分說就襲擊兩名員工，之後再喺附近攻擊多兩人，短短時間內就造成4人受傷，幸好全部冇生命危險。當地獵人接報後火速出動，到星期三終於喺工廠搵到呢隻熊嘅蹤影。獵人即刻佈下4個陷阱籠，仲獲准使用麻醉槍。點知一槍射中後，麻醉藥竟然冇成功注入！更離譜嘅係，隻黑熊竟然趁住獵人換麻醉彈嘅空檔，自己一手推開窗戶，喺眾目睽睽之下成功逃脫，完全當人類冇到！

網民洗版驚呼熊精上身市長目擊開水喉飲水嚇到O嘴

事件曝光後，大批網民喺討論區洗版，驚呼「呢隻根本係熊精」、「智商高到可以考大學」。最令人震驚嘅一幕，係警方喺熊人逃脫後，竟然目擊到佢走到市區一個水龍頭旁邊，然後純熟咁用熊掌「扭開水喉」，再將個頭湊埋去飲水解渴！超高智慧嘅行為連福島市長馬場雄基都嚇呆，公開表示呢隻黑熊嘅智力可能極高，絕對唔可以睇少。

全城恐慌中小學急停課當局出動無人機全天候追捕

為咗應對呢隻「高智商熊精」，當地政府唔敢怠慢，由星期三下晝開始已經改用無人機進行大範圍搜索。為咗確保學生安全，附近所有中小學更一度緊急宣佈改為網上授課，直到星期五先恢復返學。目前呢隻「熊界KOL」仍然在逃，當局正進行全天候追捕，提醒當地居民同遊客要極度小心！