去動物園玩，最怕就係見到猛獸出籠！近日內地一個動物園就上演驚魂一幕，一隻巨型棕熊竟然喺遊客區周圍走，仲突然從樹林衝向人群，嚇到大人細路雞飛狗走，邊跑邊大嗌「快跑！」，場面極度混亂！正當大家以為有生命危險之際，呢隻「熊」嘅一個舉動，竟然令結局180度神反轉，令人哭笑不得！
真熊生理期偷懶罷工靠A貨頂上超離譜
事件發生喺瀋陽一個動物園，原來園區內嘅真棕熊，近期因為正值「特殊生理階段」，變得懶洋洋，活動力大減，令唔少專程嚟探訪嘅遊客大失所望。園方為咗「增加趣味」，竟然諗到絕世奇招，安排職員著上熊啤啤衫「代班出巡」！影片所見，呢隻「A貨棕熊」喺園區內搖搖擺擺，動作極度擬人化。點知佢行行下突然衝向人群，有遊客當場嚇到魂飛魄散，拔足狂奔，場面離奇又爆笑。不過下一秒，呢隻「熊」竟然企定定向遊客揮手打招呼，大家先恍然大悟，原來係人扮嘅！
影片瘋傳網民洗版笑到肚痛大讚有創意
事件曝光後，相關影片喺網上被瘋狂洗版，大批網民睇完都笑到肚痛！唔少人留言話「本來係驚嚇片，點知變咗喜劇片」、「呢位員工應該加人工」、「求遊客心理陰影面積」。大家完全冇鬧爆園方，反而大讚呢個安排超有創意，令呢位「代班熊」一夜爆紅，人氣甚至比真熊更勁，成為網絡上嘅另類動物明星，唔少人都話要專登去睇呢隻「全動物園最勤力嘅熊」。
假熊變人氣巨星遊客爭相排隊打卡合照
園方事後都證實，呢隻熊的確係由工作人員扮演，目的係為咗增加同遊客嘅互動。估唔到呢個無心插柳嘅舉動，竟然令「假熊」成為園區生招牌！而家呢位「代班熊」唔單止會同真熊混埋一齊，仲會搭車、接食物，甚至上演「育兒」戲碼，搞到遊客笑唔停口。唔少人專登入場，就係為咗搵佢「打卡」影相，人氣絕對唔輸蝕俾任何一隻真動物！
