飲宴俾人情是常識吧！但如果俾足公價，去到現場先發現中伏，你會點？近日有台灣網民大呻，自己去飲朋友嗰餐，豪封$3600台幣（約$900港元）做人情，一心諗住食餐好，點知去到會場當場傻眼，所謂嘅「盛宴」竟然係快餐店食物，令佢嬲到震，怒斥：「感覺像被騙，根本係賺人情錢！」

豪封900蚊人情驚見M記凍餐加Pizza

事主喺社交平台Threads怒訴，當日去到婚宴會場，交低$3600台幣人情後，已經覺得場地佈置相當簡陋，似足大學體育館。點知司儀仲喺台上大講場面話，話新人「精心準備自助餐，要讓大家吃飽喝足」，事主仲有所期待，結果侍應一端出食物，竟然係凍冰冰嘅麥當勞套餐再加幾塊Pizza！事主當場火滾，坦言嬲到想即刻衝去禮金枱，喺人情利是入面抽返$3000台幣走人，大呻新人做法「真的有點過分」，完全係呃人！

網民群起圍插鬧爆新人食相太難睇

事件曝光後，帖文即刻被瘋傳兼引發群組洗版，大批網民替事主不值，鬧爆一對新人食相太難睇！有網民嘲諷：「婚宴吃麥當勞，這是2026年新一代搶錢大法嗎？」、「要賺錢也不是這樣」、「這對新人一定是奇葩」。更有路過嘅網民表示，當日見到婚宴餐點係麥當勞都嚇一跳，以為係賓客自己叫外賣，完全估唔到係主人家嘅安排，直斥做法太離譜，擺明當賓客係水魚！

同場賓客現身證實婚宴場地細節曝光

帖文一出，更有同場賓客現身留言證實，大呻「完全沒有事先講會是這樣的內容」，自己同樣感到超傻眼。從現場相片可見，婚宴地點位於高雄一個舊糖廠，場內只係用普通摺枱摺櫈，枱上放住即棄餐具，同一般人想像中嘅婚宴差天共地。事主原本仲期待有傳統嘅米糕、羹湯，點知最後換嚟嘅係一肚氣，難怪佢會覺得俾人呃咗，質疑新人根本唔係為咗慶祝，而係當搞生意咁賺錢！