職場風高浪急，世事難料！尤其在經濟不景時，就算打份高薪厚職都可能一夜之間「冇得撈」。美國有位打工仔就遇上人生最大危機，佢同老公竟然喺一星期內雙雙被裁員，瞬間零收入，慘到要賣樓！但估唔到呢次打擊反而成為人生轉捩點，佢憑住一個決定，短短幾年內絕地反擊，將副業變成年賺超過440萬港元嘅超強事業，簡直係真人版嘅勵志故事！

疫情下慘遭公司裁員8成老公失業一週後輪到自己

事主瑞秋（Rachel Minion）原本喺一間公司擔任行銷總監長達6年，點知疫情期間公司突然大規模裁員，一刀切裁走8成員工，瑞秋亦不幸成為其中之一。更雪上加霜嘅係，佢老公早喺一個星期前先啱啱被裁員，夫妻二人喺短短幾日內同時失去經濟支柱，徬徨到甚至決定要賣屋。面對人生低潮，瑞秋並無時間傷心，反而即刻聯絡返自己做副業時儲落嘅6個客仔，宣佈正式全職接案，決心靠自己殺出一條血路！

靠6個舊客仔翻身創業首9個月即賺23萬港元

原來瑞秋一直都有利用工餘時間，低調經營網站設計同數碼行銷嘅副業，不過為咗稅務問題，一直將副業收入控制喺每年最多7.8萬港元。今次被逼上梁山，佢將心一橫將副業「坐正」做主業，咩類型嘅案子都接。意想唔到嘅係，舊客仔不但無流失，仲繼續同佢合作，令佢喺創業第一年短短9個月內，營收就已經高達3萬美元（約23.5萬港元），為佢打下強心針。事件曝光後，唔少網民都大讚佢夠果斷，佩服佢喺逆境中嘅超強執行力！

公司年營收達440萬公開自動化秘訣與創業心得

如今，瑞秋創立嘅行銷公司年營收已高達56萬美元（約440萬港元），主要採用月費顧問模式，單一客戶收費由2,500美元（約2萬港元）起跳。佢更分享，當有核心成員離職後，佢同老公只係用咗3個星期，就成功將該職位近9成嘅工作流程自動化，大大提升營運效率。瑞秋以自身經歷鼓勵大家，創業唔需要等到所有嘢都完美先開始，因為機會一去不復返，勇敢踏出第一步先係最重要！