夏天熱辣辣，去日本旅行想飲杯冰凍飲品消暑，便利店絕對係唔少人嘅首選！最近，日本7-Eleven就睇準時機，喺6月2日推出咗一款全新夏季限定嘅「西瓜沙冰」，盛惠400円一杯，旋即喺網上掀起熱話。不過有記者買嚟實測，發現杯上嘅配料表竟然暗藏玄機，究竟呢杯話題飲品係夏日必試嘅神級出品，定係呃遊客錢嘅「伏」作？

盛惠400円新出西瓜沙冰配料表暗藏驚人伏筆

事源有日本記者喺7-Eleven見到呢款新出嘅「西瓜沙冰」，見佢標榜夏日限定，就決定買嚟試飲。點知一睇個杯蓋，上面除咗西瓜，竟然仲印有士多啤梨圖案！再細睇配料表，成份更加係嚇一跳，除咗西瓜汁同士多啤B漿，竟然仲加入咗蘋果蓉、番茄蓉同鹽做「秘密武器」。記者即時心諗，加埋咁多唔同嘅生果蔬菜，一杯賣成400円（約20港元），西瓜味仲會唔會正宗？定係又係一杯得個樣嘅「雜果冰」？

記者實測後反轉激讚口感神還原食落似真西瓜

記者抱住半信半疑嘅心情插入飲管一試，點知第一啖就完全反轉晒所有疑慮！最令人驚艷嘅係，沙冰嘅微脆冰粒口感，竟然同食緊真正西瓜嘅沙沙質感驚人地相似，簡直係「神還原」！而原本擔心會過酸嘅士多啤梨味，反而變咗恰到好處嘅點綴，完全無搶走西瓜嘅主角地位。成杯飲品由頭到尾，西瓜嘅清甜多汁都非常突出，味道濃郁又正宗，飲完成個人即刻透心涼，令人大讚物有所值！

網民熱議必搶攻略曝光6月10日限定半價優惠

呢次實測結果證明，網上嘅熱烈討論並非空穴來風，呢杯西瓜沙冰確實值得一試！而家仲有個天大好消息要話俾大家知，準備去日本嘅朋友仔要mark實日子喇！原來日本7-Eleven將會喺6月10日舉行「沙冰日」（スムージーの日），當日全線所有口味嘅沙冰，包括呢款最新嘅西瓜沙冰，全部都有半價優惠！想用最抵價錢試勻各款口味，就絕對唔可以錯過呢個慳錢嘅絕佳機會啦！