返工返到個人散晒，唔少打工仔都會趁食飯時間「叉電」補眠，但如果見到有人喺食店趴喺度瞓幾個鐘，又會唔會覺得奇怪？近日馬來西亞就發生一宗令人心寒嘅悲劇，一名男子喺小食店趴喺餐桌上長達4個鐘，店主以為佢只係太攰瞓著咗，點知下一秒男子突然滑落倒地，最終證實不治，場面駭人。

凌晨4點獨坐店內趴睡店主以為普通食客休息

事發喺馬來西亞砂拉越泗里街一個露天市集嘅小食店。根據當地警方透露，呢名男子喺凌晨大約4點鐘已經獨自一人出現喺店內，之後就一直趴喺餐桌上，看似陷入沉睡。由於時間尚早，加上可能以為只係普通食客食飽飯後小睡片刻，店主當時並無特別為意，任由佢喺度「休息」，完全無諗過一場悲劇正悄悄醞釀。

男子突滑落倒地不起醫護到場證實已無生命跡象

直到朝早大約8點25分，即係足足4個鐘之後，嗰位男食客突然成個人由張櫈度滑落，跌坐喺地上然後成個人癱軟倒地，一動不動。店主見到呢個情況嚇咗一跳，覺得事有蹊蹺，於是即刻打電話報警求助。救護車同醫護人員火速趕到現場，即刻為倒地男子進行檢查，可惜最後證實佢已經無生命跡象，返魂乏術。

警方初步列作猝死案呼籲公眾切勿胡亂揣測案情

事件驚動警方到場調查，泗里街警區主任阿斯旺迪表示，經過初步檢查，死者身上同案發現場都無發現任何涉及刑事罪案嘅可疑跡象。目前警方已經將案件列為「猝死案」（SDR）處理，並會將遺體送往醫院進行解剖，以確定真正死因。警方亦已成功聯絡死者家屬，並呼籲公眾唔好就案件作出不必要嘅揣測或渲染，以免影響後續調查工作。