養貓嘅奴才都知，主子平時幾咁高竇懶洋洋，但一到放飯時間就判若兩貓！最近，有位外國貓奴就分享咗屋企8隻貓主子嘅「暴動」級開餐實況，平靜嘅客廳瞬間變戰場，場面震撼又爆笑！
8隻貓主子聽到神秘聲響同步彈射暴走
從貓奴「@drmsbooksandcats」分享嘅影片可見，當時8隻貓貓原本各自盤踞客廳唔同角落，有啲攤喺地氈，有啲喺櫈上面，成個畫面勁Hea勁寫意。點知，當部自動餵食器一傳出飼料掉落嘅聲音，現場氣氛180度大轉變！8隻主子好似聽到軍令咁，幾乎同一時間由靜止狀態「彈射」起身，然後發晒癲咁衝向餵食器，上演一場爭食大暴走！
網民睇到O晒嘴笑稱似餓足7日7夜
影片曝光後，主子們驚人嘅同步率同誇張反應即刻引嚟網民洗版式討論，大批網民睇到O晒嘴，紛紛留言笑爆！唔少人話場面太有共鳴：「我家都有8隻貓，真係咁瘋狂！」、「完全係養貓日常！」亦有網民抵死形容：「無諗過會見到啲貓好似餓咗7日7夜咁」、「佢哋嘅表現好似喺賭場中咗頭獎一樣！」
貓奴幽默警告全港貓主切勿亂試
眼見自家主子嘅「失控」行為成為熱話，貓奴本人都忍唔住喺影片幽默表示：「睇下我啲貓喺自動餵食器放飯時會做咩」，更搞笑咁溫馨提示其他貓主：「千祈唔好喺你隻貓面前播呢條片，如果唔係佢哋都會學我啲貓咁樣！」睇嚟呢種為食暴動，真係各位貓奴甜蜜嘅負擔。
