港幣23萬心血！貴州男8年建成10層天空之城 最終下場令人唏噓

耗時8年斥23萬港元！事主親手打造10層夢幻城堡

事件主角是43歲的陳天明，多年來佢憑著一雙手，在原有嘅石屋基礎上不斷加建，用木樑、陽台同樓梯向上堆疊，最終建成一座高達10層、外型極似金字塔嘅奇特建築。由於其外型充滿奇幻感，極似宮崎駿動畫中嘅場景，因此在網上迅速走紅，被網民封為「天空之城」，更吸引大量網紅同遊客專程去打卡，成為當地一個意想不到嘅景點。

城堡慘遭夷平引爆熱議！網民慨嘆8年心血一鋪清袋

事件曝光後，在網上掀起軒然大波！原來早在2018年，當地政府已將該村列入旅遊度假區開發範圍，大部分房屋已被拆除，唯獨陳天明不願搬遷，慘成「釘子戶」。官方多次發出違建警告不果後，終於在5月20日清晨採取行動，十多名執法人員將陳天明及其父母強制帶走，短短幾小時內就將呢座10層城堡拆至僅剩一層。呢座曾經引爆網絡熱話嘅「天空之城」以悲劇收場，大批網民都替事主不值，慨嘆8年心血就咁一鋪清袋，實在太可惜。

事主心碎大呻毀滅力量太強大！誓言尋求法律援助重建

面對8年心血付諸一炬，事主陳天明事後被釋放，佢並無後悔建造呢座房子，只係平靜咁表示：「我不怪自己沒能保護住它，只是導致它毀滅的那股力量實在太過強大。」佢透露，目前已經尋求法律援助，希望法院能認定今次強拆屬於違法行為。如果得到法律支持，佢仍然希望有機會可以將呢座「天空之城」重新起返嚟，延續呢個未完嘅夢想。