屋企嘅老人家成日悶悶不樂，唔想出街又冇晒心機？呢個可能係唔少香港家庭都面對緊嘅煩惱。想佢哋開心返，試過各種方法都冇用？最近日本一項大型研究或者會畀到你意想不到嘅答案，原來一個簡單不過嘅習慣，竟然可以令長者患上抑鬱症嘅風險大幅降低，效果仲要超乎想像！
日本研究追蹤逾2萬長者揭曉驚人數據
日本筑波大學早前進行咗一項大規模研究，分析咗超過21,000名長者嘅生活習慣同心理健康數據，結果發現一個驚人關聯！研究指出，有定期觀看體育賽事習慣嘅「老友記」，患上抑鬱症嘅風險比完全唔睇嘅人低近三成。數據仲顯示，如果係親身入場睇比賽，每年去幾次，風險已經可以降低30%；如果密啲手，一個月去幾次，風險更會暴跌34%！就算留喺屋企睇電視或上網睇波，只要每星期都睇，風險一樣可以勁減29%，絕對係銀髮族嘅心靈雞湯！
專家拆解三大奇效對抗社交孤立至關重要
研究結果曝光後，唔少人都好奇點解睇比賽有咁神奇嘅功效。研究團隊解釋，好多長者精神健康變差，其實源於「社交孤立」，即係覺得無朋友、無寄託。而觀看體育賽事正正係對抗孤獨感嘅「神藥」，主要有三大奇效。第一，可以打破社交隔膜，同場內嘅陌生球迷一齊吶喊、擊掌，瞬間拉近距離。第二，鼓勵長者打扮一番，親身出門去球場，保持身體活躍。最後，睇比賽時可以盡情大叫、宣洩情緒，無論係鬧球證定係為愛隊打氣，都係極佳嘅情緒出口，心理健康自然會變好！
安老院實測成效顯著93歲婆婆都話好期待
呢個研究唔係得個講字，日本茨城縣已經即刻將佢「落地」實踐！當地政府開始同職業足球隊、籃球隊合作，更喺一間安老院推行每週集體睇波活動。結果成效非常顯著，一位71歲嘅院友就話睇運動比賽令佢好開心，而另一位高齡93歲嘅婆婆更表示，同大家一齊睇比賽係佢每星期最期待嘅事！安老院職員都話，自從有咗呢個活動，有啲院友連睡眠質素都改善咗，見到佢哋生活有返寄託同笑容，真係好感動。下次不妨都試下約埋家中嘅長輩，一齊睇返場波啦！
