搭飛機揀「窗口位」定「走廊位」向來係世紀大難題，唔少人為咗可以喺高空欣賞雲海，或者影返張呃like相，都會預先加錢鎖定窗口靚位。不過，最近有位暖男搭飛機，明明霸到靚位，但竟然主動讓座，事後更表示呢個決定令佢覺得「個位突然變得更有意義」，究竟發生咗咩事？

暖男搭飛機主動讓出窗口位 只為圓隔離伯伯一個心願

事主「@bashir_fauzi」日前喺社交平台Threads大呻，話自己一早已經揀好咗個窗口位，準備享受高空旅程。點知上機後，佢發現坐喺隔籬嘅伯伯原來係人生第一次搭飛機！事主見狀，二話不說就主動同伯伯交換座位，希望可以俾機會伯伯喺高空欣賞雲海，一圓佢嘅「首航」心願。呢個簡單嘅舉動，已經為呢趟旅程埋下一個溫暖嘅伏筆。

伯伯一句道謝惹全網淚崩 網民：呢啲先係真正嘅富有

事件曝光後，最令網民感動嘅並唔係讓座本身，而係落機前嘅一幕。伯伯臨走前特登走去同樓主道謝，講咗一句：「謝謝你，孩子，阿伯終於能從高處看雲了，以後也不知道還有沒有機會再搭。」呢句說話瞬間觸動咗事主同埋全網嘅淚腺！事主感慨表示：「突然間，靠窗似乎變得更有意義了。」佢話自己唔係為咗任何回報，只係希望有朝一日自己父母出門在外，都會遇到同樣嘅善意對待。帖文一出即刻被網民洗版式激讚，大讚事主「心地善良」、「一個小舉動，溫暖兩個人」、「呢啲先係真正嘅富有」！

網民紛紛分享催淚經歷 原來一個小舉動意義超重大

呢個暖心故事亦引發咗唔少網民共鳴，紛紛留言分享類似經歷。有網民就話，自己曾經喺吉隆坡飛往哥打巴魯嘅航班上，見到隔籬位嘅姨姨不斷望向窗外，於是主動提出換位。點知姨姨聽到之後竟然眼眶泛淚，話自己都係第一次搭飛機，成程機幾乎冇離開過個窗。唔少網民都認為，有時候一個看似微不足道嘅讓座，對某啲人嚟講，可能係一世難忘嘅珍貴回憶。