日本旅遊新熱點！鎌倉驚現「漢字雪條」室溫放30分鐘唔融化？遊客瘋搶打卡迫爆店！

漢字造型勁吸睛專利技術唔怕融

呢款喺鎌倉歷史街區新開張嘅舖頭，主打嘅就係「漢字雪條」（Kanji Ice）。雪條名副其實，真係整成一個個漢字樣，目前已經有「鎌倉」、「日本」、「忍者」等字樣，仲有濃厚朱古力、士多啤梨同牛奶等口味可以揀。不過，呢款雪條最大嘅賣點，係採用咗日本Fulllife公司嘅專利技術，可以有效減慢融化速度，就算喺室溫下放足30分鐘，都仲可以保持固態！對於鍾意相機食先嘅遊客嚟講，絕對係天大喜訊，可以拎住佢慢慢喺景點影相，唔使驚影兩張就滴到成手都係。

黃金周遊客瘋搶IG洗版掀起熱話

正因為呢個「唔會融」嘅神奇賣點，加上超特別嘅漢字造型，呢款雪條喺日本黃金周連假期間瞬間爆紅！大批遊客慕名而來，人手一支瘋狂打卡，令呢款雪條喺社交平台被瘋狂洗版。店方雖然預計到人流會增加，但完全估唔到反應會咁熱烈，結果多款口味嘅漢字雪條好快就被搶購一空，唔少遊客專程去到都只能失望而回。

分店擴展至京都靜岡推富士山限定版

由於反應太好，呢款漢字雪條已經唔再係鎌倉獨有！目前業務已經擴展到京都京瓷桑加體育場、靜岡縣JR新富士站，甚至山梨縣嘅富士芝櫻祭等地。為咗配合唔同景點，店家更推出地區限定版，例如「富士山」字樣雪條，真係誠意十足。商家仲話，未來希望將呢款打卡神物帶到更多日本觀光景點，甚至提供客製化服務，睇嚟呢股「漢字雪條」熱潮仲會持續好一陣子！