人與動物之間嘅感情可以好純粹，有時一個小小嘅舉動，已經足以融化人心。最近美國一間動物收容所就分享咗一個超暖心故事，一隻極度恐懼男性嘅狗狗，竟然因為一位男義工嘅「變裝」而慢慢打開心扉，究竟發生咗咩事？
流浪沙皮狗勁驚男人男義工出奇招戴假髮扮女人
呢隻叫維尼（Winnie）嘅沙皮狗，早前喺街頭流浪，被送到洛杉磯一間動物收容所。職員發現佢雖然性格溫和，但有個好奇怪嘅情況，就係只肯俾女性靠近，一見到男性就會勁不安，甚至係咁吠！為咗幫維尼重建信任，一位男義工諗到條絕世好橋，竟然戴上假髮去接近維尼，希望可以拉近彼此距離。
暖心舉動獲網民激讚留言洗版你是最棒的
事件曝光後，大批網民即刻被呢位男義工嘅暖心舉動感動，影片同相喺社交平台被瘋傳洗版！唔少人留言激讚：「你是最棒的」、「謝謝你的努力」、「狗狗好可愛」，大讚義工嘅耐心同愛心，完全係天使嘅化身！呢個做法雖然睇落有啲奇怪，但成功令維尼逐漸放下防備。
狗狗成功卸下心防收容所盼有心人給維尼一個家
喺義工嘅耐心陪伴下，維尼最初雖然覺得有啲奇怪，但好快就放低戒心，安心享受呢份得來不易嘅陪伴。收容所表示，維尼雖然唔係一隻黐人嘅狗，但只要同佢建立咗感情，就會死心塌地認定你。目前佢哋正積極為維尼尋找一個永遠嘅家，希望有心人可以俾呢隻曾經受傷嘅狗狗一個溫暖嘅歸宿。
