百物騰貴，喺香港食個午餐閒閒地都幾十蚊，想搵平嘢食真係難過登天！不過，最近有日本記者就發現東京一間餐廳竟然反其道而行，推出超狂優惠，一個份量十足嘅燒肉丼飯套餐，埋單竟然可以只係1円（約港幣$0.05）！消息一出即刻引起關注，究竟點先可以歎到呢個「1円午餐」？原來老闆開出一個條件，就係要喺埋單前同佢決一勝負！

東京逆市奇招吸客！猜拳贏老闆燒肉丼只收¥1埋單

呢間推出震撼優惠嘅餐廳，就係位於東京中野區嘅「BBQ Terrace Nakano」。餐廳喺平日午市時段（上午11點半至下午2點）推出猜拳挑戰，食客只要點選原價1,200円（約港幣$61）嘅「燒牛橫膈膜丼」或「燒鳥丼」，就有機會參加挑戰。套餐絕不欺場，有齊主食、白飯、麵豉湯同漬物，份量十足。而挑戰嘅內容非常簡單，就係喺食完飯埋單時，同餐廳老闆猜一盤「包剪揼」，只要你贏到，成個餐就即刻由1,200円劈價到1円，足足慳返1,199円，簡直係匪夷所思！

記者直擊決戰實況！先食後付玩心理戰勁緊張

有記者就親身去實測挑戰，佢點咗一份燒牛橫膈膜丼，大讚牛肉片厚切多汁，配上特製醬汁同蛋黃，味道極佳，就算要畀足1,200円都絕對值回票價。最特別嘅係，餐廳安排食客「先食後猜」，等你歎完一餐美食之後，先要去收銀處同老闆進行終極對決。呢個安排無疑係一場心理戰，當你食完一餐滿足嘅午餐後，究竟會唔會因為怕輸而壓力大增？記者去到收銀處，老闆親自應戰，氣氛瞬間變得超緊張！第一局雙方同樣出「包」，打成平手！第二局記者轉陣出「揼」，老闆竟然出「剪」，勝負已分！

成功KO老闆埋單僅¥1！網民心動：優惠期有限要快手

記者成功喺第二局KO老闆，贏得挑戰，原價1,200円嘅午餐，最終真係只用一個1円硬幣就成功埋單，慳返足足1,199円，感覺就好似中獎一樣！記者都話估唔到真係可以用一個1円銀仔就食到一餐咁豐富嘅午餐。據老闆透露，呢個猜拳優惠原定只係去到5月底，但因為反應熱烈，佢正考慮延長優惠期。不過優惠始終唔會係永久，想去東京旅行又對自己猜拳技術有信心嘅朋友，真係要把握機會去挑戰下，隨時可以贏返餐晏仔！