去旅行住度假村，最怕遇上衛生問題，但如果喺廁所見到嘅唔係污跡，而係致命生物，真係隨時嚇到個心都離一離！最近，有5名遊客去菲律賓一個度假村，其中一位男士如廁時嘅恐怖經歷，就令成個網絡睇到崩潰，皆因佢喺馬桶入面，竟然同「世界最致命毒蛇」有咗一次「親密接觸」！

去廁所見黑影以為未沖淨 狂沖水驚見蛇頭狂吐信

事發喺菲律賓內格羅斯島一間鄰近自然公園嘅度假村，事主憶述當時入到浴室，發現馬桶內有一團黑色異物，初時不以為意，以為只係上手未沖乾淨。點知佢反覆沖水後，嗰團「黑影」依然頑固地漂浮。正當佢疑惑之際，馬桶排水孔下方突然冒出一粒蛇頭，仲對住佢瘋狂吐信，嚇到佢即刻衝出浴室大叫求救！同行友人初頭仲以為佢惡作劇，點知成班人走近一睇，先發現馬桶內真係有條蛇！其中一位朋友大膽用木棍試探，點知條蛇突然成條滑出嚟，嚇到現場5個人瘋狂尖叫，場面極度混亂！

影片瘋傳網民洗版驚呼 爬蟲專家疑為眼鏡王蛇

事件影片被上載至社交平台後，隨即引發網民洗版式討論，唔少人都話睇到腳軟，「我以後唔敢去廁所了」、「掀蓋嗰下真係會嚇死」、「而家連馬桶都唔安全」。更恐怖嘅係，有爬蟲類愛好者睇完影片後，根據蛇嘅體型同外觀，判斷呢條蛇極有可能係「世界最致命毒蛇之一」嘅眼鏡王蛇（King Cobra），其毒液足以喺短時間內攞命！呢個推斷令網民更加崩潰，直言去旅行真係要打醒十二分精神。

警方追查毒蛇來源或因高溫入屋 當局籲遊客切勿自行處理

事件驚動當地警方，由於度假村附近曾多次發現眼鏡王蛇蹤跡，警方正追查毒蛇來源，唔排除係有人非法飼養後走甩，亦有可能係近期天氣炎熱，蛇類為咗搵陰涼潮濕嘅地方，先會捐入排水系統避暑。度假村職員接報後已即時處理，當局亦提醒市民及遊客，由於度假村鄰近自然保護區，遇到蛇類千祈唔好自己郁手，應該立即通知職員或相關部門求助，以免發生危險。