去日本旅行，不少人都鍾意去二手店尋寶，希望用超抵價執到心頭好。最近，有位日本男玩家就以為自己行運，在二手店僅用110日圓（約5.5港元）就買到心水經典遊戲，點知返到屋企滿心期待開箱，入面嘅「驚喜」竟然令佢當場傻眼，事件更在網上瘋傳，引發網民瘋狂洗版！
日男$5.5買二手Game開箱驚變限制級
事主大呻，日前佢喺日本一間二手實體店嘅「Outlet／Junk」特價區尋寶，見到一盒任天堂經典遊戲《瑪利奧網球GC》標價僅需110日圓（約5.5港元），價錢平到笑，以為自己執到絕版平貨，於是二話不說即刻俾錢買走。誰知返到屋企，佢滿心歡喜打開遊戲盒，準備重溫經典，點知映入眼簾嘅並非瑪利奧遊戲光碟，而係一張疑似前物主留下嘅成人影片DVD！呢個「驚喜」令佢當場哭笑不得，完全估唔到買Game竟然有咁嘅神反轉結局。
網民瘋狂洗版笑稱尺寸升級賺咗
事件曝光後，大批網民湧入事主嘅社交平台「食花生」，帖文被瘋狂洗版！唔少網民非但冇同情事主，反而幽默留言打趣，笑稱呢個係「意外嘅收穫」。有網民笑爆話遊戲「尺寸升級咗，畀個好評」，又有人話呢款遊戲變成支援「另一種控制器」嘅單人遊戲。更有網民抵死分析：「變成咁樣唔係仲好咩？網球現實生活中都可以打，但巨乳大姊姊喺現實中可係唔存在㗎！」言論令人哭笑不得。
二手店品管問題惹議玩家呻買碟要拍片
雖然大部分網民都係抱住睇熱鬧嘅心態，但亦有部分人認真討論事件，直指反映咗二手實體遊戲買賣嘅品管問題，感嘆「打開發現唔係遊戲，真係太糟糕喇！」呢單烏龍事件搞到唔少玩家都笑言，以後買二手實體碟，可能真係要即場開盒檢查，甚至全程錄影自保，如果唔係滿心期待換嚟嘅可能唔係遊戲，而係另一種意想唔到嘅「限定驚喜」！
