印度8歲神童挑戰極限！頭頂地倒立唱經3分47秒網民睇完唔係讚而係鬧爆？

世界無奇不有，小朋友嘅潛能更加係深不可測！近日印度就有一名8歲男童，以超高難度嘅瑜伽動作，成功創下世界紀錄，影片喺社交平台瘋傳。不過，呢個驚人創舉並冇得到一面倒嘅掌聲，反而引發網民激烈爭議，甚至鬧爆要求佢即刻去醫院？

8歲神童頭頂地倒立足足3分47秒

事發於印度卡納塔卡邦，年僅8歲嘅男童奧姆（Om N）挑戰人體極限。從網上瘋傳嘅影片可見，佢先以倒立姿勢完成瑜伽動作「頂立式」，然後再將難度升級，雙手合十，單靠個頭頂支撐住全身重量！最誇張嘅係，佢喺呢個狀態下，仲要唱誦對兒童嚟講極之難記嘅梵文頌歌《濕婆坦達瓦頌歌》。最終，奧姆成功堅持長達3分47秒，驚人毅力獲當地國際紀錄認證機構核可。

網民反應兩極群組洗版鬧爆無意義

事件曝光後，隨即引發網民洗版式討論，但反應就相當兩極。不少網民大讚佢係天才，留言表示「這孩子這麼小就能做到這些，太不可思議了」、「向他的活力和奉獻精神致敬」，認為佢毅力驚人。不過，更多網民睇完係心痛多過驚嘆，紛紛鬧爆呢種行為！有人直斥「印度人經常曲解規則，創造出毫無意義、莫名其妙的紀錄」，更有人擔心男童嘅身體狀況，留言話「我覺得要他先去醫院」，呼籲家長同機構應該要更重視兒童嘅身體承受能力，唔應該為咗一個紀錄而攞個仔嘅健康較飛。