婚禮本應是充滿祝福同歡樂嘅場合，但有時為咗搞氣氛玩得太癲，隨時樂極生悲！最近澳洲就有一位靚女伴娘，喺好姊妹嘅婚禮上為咗炒熱氣氛，即場表演高難度舞步，點知下一秒身上嘅晚禮服竟然應聲爆開，超尷尬嘅一幕被拍低放上網，影片觀看次數更突破840萬，引起全城熱話！

為炒熱氣氛表演毛毛蟲舞禮服應聲爆開

事件主角係一位28歲嘅物理治療師喬治（Georgie Ball），佢當日以伴娘身份出席好友艾莉（Ellie）喺溫泉小鎮馬奇（Mudgee）舉行嘅婚禮。據喬治事後透露，其實身上套貼身長禮服早喺彩排時已經出事，當時佢因為飲咗幾杯，興之所至練習側手翻同毛毛蟲舞，已經聽到布料撕裂聲，到正式進場時，裂縫更已長達30CM！但興奮嘅佢一於少理，進場時決定繼續表演「倒退毛毛蟲舞」，點知一趴落地，禮服縫線即刻徹底爆開，渾圓蜜桃臀當眾現形，連高踭鞋都斷埋，場面極度狼狽！

影片瘋傳840萬次網民群起熱議畫面太衝擊

事件影片在TikTok上曝光後，隨即引發病毒式傳播，至今已累積超過840萬次觀看！大批網民睇完都嚇親，紛紛留言洗版，有網民笑爆話「如果係我嘅婚禮，我會羞愧到晚晚做惡夢」、「呢個畫面真係會失眠到死」。不過亦有唔少網民錯重點，大讚事主身材火辣，「個pat pat好靚」、「呢個伴娘好搶鏡」。

事主淡定回應超有自信對健美身材感驕傲

面對全網「食花生」，事主喬治不但冇感到難堪，反而超大方回應！佢強調自己當時有著膚色丁字褲，仲笑言對自己持續健身8、9年嘅健美身材相當有信心，更霸氣表示：「我很樂意接受大家對我臀部的讚美，這是我除了美麗的大腦之外，最棒的資產之一！」據悉，當時證婚人即刻拎出近20支安全扣針幫佢急救，但都搞唔掂，最後要新娘媽媽脫下披肩俾佢圍住腰先化解到危機，真係睇見都覺得尷尬！