養寵物最怕遇到「拆家」高手，但如果兇手唔係貓狗，而係一隻馬，你又點睇？近日內蒙古一個馬場就發生一宗超離奇嘅「拆家」事件，一隻4歲半嘅血馬竟然趁教練唔為意，自己推門入屋大肆破壞，更跳上飯枱將全屋搞到一片狼藉，令事主哭笑不得，場面極度震撼！
趁教練唔為意偷入屋 4歲馬仔失控跳上飯枱搗亂
事發喺內蒙古通遼一個馬場，教練董先生憶述，當時佢只係短暫入屋飲啖水，點知隻4歲半嘅血馬就趁門未關好，自己推門闖入屋內。眾人見狀即刻上前想趕佢走，但呢隻馬仔完全唔合作，一聽到有人喝罵，竟然受驚直接跳上飯枱！影片所見，馬仔喺枱上瘋狂踩踏，將飯碗、水杯、廚具等全部掃落地，搞到鍋碗瓢盆散落一地，連張枱都被踩到花晒，屋內瞬間變成廢墟咁亂。
網民睇到O晒嘴 封佢為馬界二哈簡直係拆家之王
事件曝光後，大批網民睇到目瞪口呆，隨即喺網上瘋傳洗版！唔少人替教練慘之餘，更多係覺得難以置信又爆笑，紛紛留言「呢隻馬真係馬場顯眼包」、「破壞力驚人」、「求教練心理陰影面積」。更有網民將佢同出名「拆家」嘅雪橇犬比較，笑稱佢係「馬界二哈」，甚至誇張咁講「二哈見到佢都要拜師學藝」，形容佢嘅破壞力已經超越物種極限！
教練揭驚人真相 原來智商高如4歲細路勁百厭
面對呢個失控場面，工作人員都唔敢貿然用蠻力拉扯，驚會刺激到馬仔造成危險。最終，董教練要用馬料做餌，先成功引誘佢慢慢行返出屋外。董教練事後無奈表示，呢隻血馬其實智商好高，心智同行為就好似三、四歲嘅小朋友，平時已經好奇心強又百厭，估唔到今次會玩到咁大！好彩事件中只係財物損失，冇人受傷，算係不幸中之大幸。
