小朋友唔想做功課，藉口多多相信各位家長都見唔少，但做到咁盡你又見過未？近日河北有位媽媽大呻，指兒子喺短短一個月內竟然先後「唔見」咗9次書包，平均每3日就唔見一次！頻率高到令佢極度憂心，一度懷疑個仔係咪喺學校俾人蝦，擔心到差啲想報警求助，點知跟蹤之下，先發現一個令人哭笑不得嘅真相！

媽媽心慌慌暗中跟蹤 驚見兒子熟練將書包塞入神秘石縫

由於情況實在太唔尋常，為咗查明真相，呢位媽媽決定親自出馬，喺個仔放學之後靜靜雞跟喺佢身後。點知跟到屋企附近嘅綠化帶時，佢竟然親眼見到驚人一幕！個仔行到一堆大石頭旁邊，動作純熟咁將成個書包塞入石罅入面，完美收藏！完成「任務」後，個仔隨即兩手空空、表情輕鬆咁行返屋企，個樣開心到「比考第一名還開心」，完全唔似啱啱唔見咗書包！

事件曝光網民洗版熱議 爆笑稱：呢招從根源解決問題！

事件喺網上曝光後，隨即引發群組洗版！大批網民睇完都笑爆，紛紛留言話「我細個嗰陣點解諗唔到呢招」、「呢個係從根源解決問題」、「唔係我唔寫，係我啲工具唔見晒」。有網民更佩服男童嘅創意，認為佢唔係單純話唔記得帶功課，而係直接將「犯罪工具」毀屍滅跡，製造完美嘅「書包失蹤」假象，實在係「人才」！

真相大白竟為逃避功課 網民笑指：可以一次過回收9個書包

原來，呢位男童費盡心機，自編自導自演一個月唔見9次書包嘅大龍鳳，背後原因極之單純，就係為咗唔想做功課！相比其他小朋友嘅小把戲，呢招「釜底抽薪」確實令人意想不到。有網民就抵死留言，建議媽媽可以沿路搵下，話唔定可以喺唔同嘅石罅「回收」返之前唔見嗰8個書包，一次過嚟個大豐收！