打工仔日日做到隻積咁，有冇諗過創業闖出一片天？國外一名42歲OL就完美示範咩叫「膽大心細」，辭職後膽粗粗喺自家廚房創業賣雪糕，點知一度搞到周身債，欠下超過157萬港元巨款！當人人都以為佢會執笠收場，佢竟然靠一款「獨門怪味」雪糕絕地反擊，結局令人超意外，年銷售額更激增至2200萬港元，簡直係創業奇蹟！

OL晚宴忽發奇想靠印度香料口味突圍

事主巴維什（Bavishi）本身係個專業人士，擁有碩士學位，但佢嘅夢想係「透過甜品傳遞快樂」。2014年一次晚宴後，佢忽發奇想用廚房常見嘅生薑、八角等材料自製雪糕，效果竟然出奇地好，令佢萌生創業念頭。2015年，佢正式創立雪糕品牌Malai，主打印度香料風味，例如小荳蔻、玫瑰、藏紅花等，喺傳統嘅雪糕市場中殺出一條血路。創業初期極度艱難，佢幾乎只靠自己嘅伙食費死頂，平日喺屋企廚房整雪糕，週末就拎去市集擺檔試水溫，仲要周圍問朋友借露營雪櫃用，相當辛酸。

主流媒體報道成品牌逆轉關鍵

正當生意停滯不前，品牌嘅轉捩點終於出現！《紐約時報》一位美食專欄作家嘅報道，令Malai一夜成名，首次登上主流媒體，網上訂單即時爆升。當時所有訂單仲係由巴維什親手包裝同寄貨，可見其規模之細。為咗捉緊機會擴張，佢開始碌爆信用卡買材料、租用共享廚房，更喺2017年獲得親友一筆小額投資，用嚟開設快閃店同尋找永久舖位，為品牌嘅逆轉之路鋪路。

曾硬食157萬卡債最終年賺2200萬

為咗喺紐約布魯克林開設第一間實體店，巴維什做咗一個佢自己都形容為「可怕」嘅決定——孭起高達20萬美元（約157萬港元）嘅信用卡債務！呢個決定令佢足足用咗兩年時間先還清債務。不過，正所謂「有危才有機」，店舖走上軌道後，佢再透過融資籌集約1410萬港元資金，一口氣連開4間分店。經過多年將擴張放喺首位嘅策略後，公司終於喺2024年實現盈利，去年總銷售額更衝上280萬美元（約2200萬港元），由一個廚房仔嘅夢想，變成一個年賺過千萬嘅成功品牌！