去旅行最怕遇上意外，尤其係去到多馬騮嘅地方，隨時一個唔留神，身上財物就可能被洗劫一空！日前有位遊客去峇里島旅行時，就慘遭馬騮當場搶走手機，正當佢以為手機凶多吉少之際，2小時後尋回手機，一開相簿竟然發現驚人畫面，令佢大感意外！
峇里島景區遇最強劫匪手機慘被馬騮搶走
事主胡先生大呻，佢日前去印尼峇里島一個景區遊玩期間，手上部手機突然被一隻馬騮高速搶走！事主當堂嚇呆，即刻向景區工作人員求助。工作人員當時都打定輸數，提醒佢要有心理準備，話隻馬騮好大機會會將手機掟落懸崖，未必搵得返。胡先生當時心諗部手機凍過水，點知喺苦等足足2個鐘之後，工作人員竟然成功將手機尋回，真係鬆一口氣。
網民群起公審笑稱馬騮係最強土匪
事件曝光後，大批網民都替事主捏一把汗，事主胡先生將呢段奇遇放上社交平台後，隨即引發群組洗版！唔少網民都留言分享自己喺景區被馬騮「打劫」嘅慘痛經歷，眼鏡、帽、耳機通通都係目標，簡直防不勝防。有網民更笑稱景區嘅馬騮係「最強土匪」，甚至打趣話：「再叻啲識用電腦就可以返工啦！」，場面非常搞笑。
結局神反轉驚見23秒馬騮視角自拍片
原以為事件有驚無險告一段落，點知當晚胡先生一check手機相簿，竟然發現多咗一批由馬騮「操刀」嘅大作！當中除咗幾張構圖混亂嘅大特寫相，仲有一段長達23秒嘅自拍片！胡先生估計係馬騮喺逃走或者玩手機嗰陣，唔小心撳到相機掣，意外拍低咗一段超珍貴嘅「馬騮視角」叢林生活Vlog，真係不幸中之大幸！
