返工為夢想定係為兩餐，相信係唔少打工仔嘅人生交叉點。美國紐約一位高中女教師，本身擁有穩定「鐵飯碗」，日日循循善誘教導學生，點知竟然因為學生一句無心嘅提問，令佢當場啞口無言，最後更狠心辭職！估唔到呢個決定，竟然令佢嘅收入幾何級式暴增，結局令人超意外！

學生一句神提問直插心臟 女教師決定放棄穩定教職

事主Hannah Bigeleisen本身係一位高中老師，同時亦係一位充滿熱誠嘅藝術家。為咗家庭有份穩定收入，佢選擇將重心放喺教職，但內心嘅創作夢想從未熄滅。直到有一次，佢鼓勵一位即將畢業、對前路感迷惘嘅學生要勇敢追夢，點知學生竟然反問佢：「咁老師你自己有冇追夢？」呢句說話好似一支利箭，直插Hannah心臟，令佢瞬間沉默，並開始重新審視自己一直以來為現實而妥協嘅人生。

轉型傢具設計初嘗成功 驚覺藝術原來可以當飯食

被學生「一句KO」後，Hannah返屋企嘅路上不斷反思。佢意識到自己一直教人追夢，自己卻停喺原地。於是佢毅然作出改變，將創作方向由純藝術雕塑，轉為更貼近市場、兼具實用性嘅傢具同燈具設計。佢推出嘅第一款燈具作品「Ellsworth Lamp」，竟然喺布魯克林設計展上即時被買家睇中並成功賣出，呢次經驗令佢第一次發現，原來自己嘅夢想真係可以變成一盤賺錢嘅生意！

辭職一年收入狂飆5倍 月入暴增至12萬港元

睇到事業嘅可能性後，Hannah喺舊年9月正式辭去教職，全身投入自己嘅工作室。過去佢兼職搞創作，工作室一年收入僅約4萬美元（約31萬港元）。辭職後，佢專心鑽研品牌經營同市場推廣，客戶同合作愈來愈多，收入亦直線上升！工作室舊年營收已達8.6萬美元（約67萬港元），今年更預計將會突破20萬美元（約156萬港元），平均月入高達1.5萬美元（約12萬港元），比起以前做老師嘅收入多幾倍！佢嘅經歷證明，只要踏出第一步，追夢都可以有飯開！