去日本旅行飲清酒、威士忌就飲得多，但你有無諗過連「燒酎」都可以有新玩法？最近有記者去到鹿兒島縣一個偏遠小島「奄美大島」，探訪一間有近百年歷史的燒酎廠，點知竟然發現一個超乎想像的釀酒秘方！傳統木桶旁邊竟然裝上演唱會級數的巨型喇叭，每日播足8個鐘音樂，據講唔同音樂風格，釀出嚟嘅酒味都完全唔同，真係聽到都覺得神奇！

直擊99年酒廠古怪釀酒法！木桶竟裝巨型喇叭播足8個鐘

呢間有99年歷史嘅「西平酒造」，由第四代主理人西平せれな小姐親自接待。佢本身仲係一位音樂人，難怪諗到將音樂同釀酒結合！參觀完用400公斤白米釀製燒酎嘅傳統工序後，主理人就帶記者去到一個神秘空間，一打開門，眼前嘅畫面嚇親人——一排排嘅陳年木桶，竟然全部駁住演唱會級數嘅巨型喇叭！原來呢個就係酒廠獨家嘅「Sonic Aging Project」，喇叭會每日播放8個鐘音樂，一年加埋足足「聽」咗2,000個鐘！現場總共有6種唔同音樂風格，包括House、Reggae、Hip-hop、拉丁、Rock同埋島唄（南部島嶼民謠），場面非常震撼。

記者實測Reggae對比島唄燒酎！味道顏色竟有天淵之別

主理人解釋，呢個做法並唔係純粹搞綽頭。佢話唔同音樂類型會產生唔同嘅震動，尤其係低音強勁嘅音樂，會令酒體同木桶有更強烈嘅相互作用，從而影響燒酎嘅顏色同風味。為咗證明所言非虛，記者即場實測試飲。結果真係令人大吃一驚！聽Reggae（雷鬼音樂）嘅燒酎，因為震動最強，顏色明顯更深，木桶味更濃郁，帶有獨特嘅甘苦味；相反，聽島唄（民謠）嘅燒酎，震動最柔和，酒色較淺，口感更清爽，酒精感亦較突出。而聽Rock（搖滾樂）嘅版本，風味就啱啱好介乎兩者之間，真係飲得出分別！

主理人解畫邊款最好飲？答案竟與揀歌品味完全一樣

咁多款音樂燒酎，究竟邊款先係最好飲？主理人笑住話，呢個問題並無標準答案！就好似每個人鍾意嘅音樂類型都唔同，唔同人對呢幾款燒酎嘅喜好都會唔一樣，各有各嘅魅力。呢個「聽音樂大」嘅燒酎系列，除咗可以喺官網訂購之外，酒廠亦提供參觀預約，下次去開鹿兒島，不妨去呢個偏遠小島朝聖一下，親身感受音樂同美酒嘅奇妙結合！