你係咪都試過，分手後搵嘅下一個，無論樣貌、氣質定性格，都同個ex有幾分相似？身邊朋友甚至會笑你「來來去去都係鍾意呢type」。呢種情況原來唔係巧合咁簡單！最近有心理專家指出，呢種「固定審美」背後，可能係你嘅大腦一早就幫你做好咗決定，你嘅理想伴侶類型，可能一早已經「整定」咗！

新歡係舊愛倒模？心理學家揭驚人真相：大腦一早整定！

事件引發熱議，源於有網民發現英國前足球員傑曼．傑納斯（Jermaine Jenas）嘅新歡，竟然同佢前妻好似「倒模」一樣，由髮型、五官到氣質都極度相似。心理學家麥克勞德（Phil Macleod）就解釋，呢個現象其實好普遍，背後係因為我哋大腦會根據過往嘅戀愛經驗，不知不覺間建立一套「理想伴侶模板」，心理學上稱為「愛情地圖」（love map）。當某種類型嘅人曾經帶俾你安全感或快樂，大腦就會自動將呢啲特徵設定為「優先搜尋」目標，令你喺茫茫人海中，不自覺咁被相似嘅人吸引。

Kanye West都中招！網民熱議名人固定審美原來關童年事

呢個理論一出，即刻引起網民瘋狂討論，仲有唔少人翻出名人情史做例子！好似英國賽車手咸美頓（Lewis Hamilton）歷任女友都被指氣質相近；而最經典嘅莫過於Kanye West，佢同前妻Kim Kardashian分開後，新歡Bianca Censori嘅外形亦被指同Kim極為相似，令「固定審美」呢個話題被瘋狂洗版。專家麥克勞德補充，影響呢張「愛情地圖」嘅，唔單止係前度，更可以追溯到童年經歷、原生家庭，甚至係一啲未處理好嘅情感創傷。因為大腦會將「熟悉感」同「安全感」劃上等號，所以先會令你對某啲特質嘅人特別容易產生好感。

以為自己揀其實係潛意識話事？專家：你嘅愛情地圖早已畫好

咁係咪代表我哋喺愛情入面完全無得揀？麥克勞德就提醒，又唔可以咁講。雖然潛意識嘅「愛情地圖」影響深遠，但大腦仍然會綜合吸引力、幽默感、自信同情感連結等唔同訊號去作出最終判斷。簡單嚟講，當你以為自己係自由戀愛、精心挑選緊伴侶嘅時候，其實你嘅潛意識一早就已經參與其中，甚至悄悄地幫你篩走咗好多「唔啱feel」嘅人。換言之，你以為係自己嘅選擇，但好可能只係跟住一張早已畫好嘅地圖去行！