平時去便利店買嘢食，最怕就係見到「空氣包裝」，價錢就加，份量就愈嚟愈縮水，真係睇見都嬲！不過，凡事總有例外。最近日本7-Eleven就反其道而行，推出一個名為「創業感謝祭」嘅超大型優惠，多款人氣食品份量直接激增50%，價錢竟然維持不變！消息一出，即刻引起關注，有日本記者更親身去實測，結果發現其中一款拉麵嘅份量，竟然誇張到嚇親人！
記者實測$37巨無霸拉麵！重逾1KG份量滿到瀉勁誇張
今次增量系列中最矚目嘅，莫過於由千葉縣獲獎拉麵店「中華蕎麥富田」監修嘅「特級豬油Mega豚肉拉麵」。呢款拉麵售價734.40日圓（約港幣$37），價錢不變但份量大增。有記者抱住好奇心買嚟實測，一放上電子磅，結果數字嚇到佢O嘴——連埋容器竟然重達1,084克！扣除容器重量後，淨食物都超過1公斤，絕對係「重量級」選手。記者表示，單係用微波爐加熱就要10分鐘，加熱期間濃烈嘅蒜味已經攻陷全屋。一打開蓋，堆到成座山咁高嘅叉燒、芽菜同椰菜，多到幾乎睇唔到下面嘅麵，場面極之震撼。記者更要使出日本食家嘅秘技「天地返」，先可以將底層嘅麵同配料撈勻，過程相當有難度，可見其份量有幾驚人！
一改孤寒縮水形象！回應網民怒批份量少到離譜
其實7-Eleven今次如此「佛心」，背後原因可能同早前嘅風波有關。事緣近年唔少日本網民都鬧爆，指控各大便利店嘅食品愈出愈「孤寒」，份量不斷縮水，大玩「隱形加價」，令消費者大感不滿。而7仔今次呢個「報恩級」增量活動，就似乎係對網民批評嘅一次正面回應，用實際行動證明自己「冇偷工減料」。記者食後都大讚，拉麵嘅蒜香同豬油味極之濃郁，麵條亦夠晒彈牙，品質完全唔似一般便利店水準，加上超乎想像嘅份量，CP值簡直爆晒燈，食到尾聲已經飽到捧住個肚，完全冇空間再食其他嘢。
同場加映三文治麵包同步升級！期間限定錯過就無
除咗巨無霸拉麵，今次增量系列仲有其他驚喜！例如人氣嘅「THE蛋沙律三文治」，就由原本嘅兩件加碼到三件；而「粟米蛋黃醬麵包」嘅尺寸亦大幅升級，大到幾乎有成部智能電話嘅兩倍！不過各位想去朝聖就要留意，今次活動係分階段兼期間限定，第一階段由5月12日至5月25日，而第二階段就會喺5月19日至6月1日推出新嘅增量產品。最近會去日本旅行嘅朋友，真係唔可以錯過呢個「食窮7仔」嘅大好機會！
