動漫迷注意！如果你係經典神作《阿基拉》（Akira）嘅忠實粉絲，以下消息絕對會令你瘋狂！被譽為日本動畫界傳奇嘅大友克洋，多年來除咗《阿基拉》同《Steamboy》之外，鮮有執導長篇動畫，令唔少粉絲大感可惜。不過，大師最近就無預警下投下震撼彈，宣佈成立個人動畫工作室，而且仲有驚人舉動，睇到最後可能會改變你嘅人生！

唔係講笑！神作導演開Studio兼重啟《阿基拉》

消息指，大友克洋已於東京武藏野區正式成立名為「Oval Gear Animation Studio」嘅全新動畫工作室。據官網介紹，成立工作室有兩大目的，一係希望將自己幾十年嚟嘅電影製作方法同創作觸覺傳承俾新一代，二係為全球市場製作全新嘅動畫作品。而最令粉絲引頸以待嘅，就係工作室目前已經有兩大項目正在籌備，分別係2019年已公佈嘅科幻劇場版動畫《Orbital Era》，以及一個全新嘅《阿基拉》動畫項目！雖然未知新《阿基拉》係重製定係續集，但單係「大友克洋」加上「阿基拉」呢個組合，已經足以令全球粉絲陷入瘋狂！

消息曝光全球粉絲洗版！感動高呼：終於等到大師出山

事件曝光後，大批動漫迷喺各大討論區瘋狂洗版，紛紛表示難以置信！唔少粉絲感動留言「有生之年竟然等到大友克洋出山」、「究竟新《阿基拉》會係點？超級期待！」、「神作終於要傳承落去」。大友克洋作為動畫界嘅泰山北斗，一舉一動都備受關注，今次唔單止重出江湖，仲要栽培新一代，令唔少人覺得係業界一大喜訊。不過，最令網民震驚嘅，其實係工作室嘅下一步行動。

史上最筍筍工？全球招聘動畫師零經驗唔識日文都請

原來工作室成立後，隨即就展開全球招聘，職位包括動畫師同製作支援人員。而最令人跌破眼鏡嘅，係招聘要求竟然列明「無需經驗」（no experience required）！更誇張嘅係，對日文能力嘅要求都只係「會話水平」，意味住就算日文唔流利都有機會入選，完全係為全球有志投身動畫界嘅粉絲大開方便之門！呢個門檻低到嚇親人嘅「筍工」消息一出，唔少香港網民都話要即刻學返兩句日文去應徵，話唔定真係有機會同大師一齊製作神作，簡直係發夢都估唔到！