大家行超市買零食，見到包裝寫住「水果」、「健康」係咪就即刻放心買？小心隨時中伏！美國一位醫生就發現，市面上大部分所謂嘅水果零食，根本就係「掛羊頭賣狗肉」，成分表嚇死人。佢因為睇唔過眼，竟然毅然放棄醫生高薪厚職，決心創業撥亂反正，結果靠一個超簡單嘅諗法，成功創造出年收7.8億港元嘅零食王國！

醫生踢爆市面水果零食呃人決定棄醫從商創品牌

事件主角係美國醫生Lior Lewensztain，佢早喺2005年讀緊醫學院時，就從數據發現驚人事實：全美國竟然得約三分一成年人食夠每日建議嘅水果量！呢個發現令佢好奇，市面上標榜「含水果」嘅加工零食，究竟有幾多真材實料？佢於是走遍各大超市，檢視數百款果乾、果汁軟糖等產品，結果發現絕大多數都係用濃縮果汁、葡萄糖漿、麥芽糊精同各種添加劑製成，根本冇乜真正水果。面對呢個「騙局」，佢醫學院畢業後再讀埋MBA，決定唔做醫生，喺2012年創立品牌「That’s it.」，推出只用兩種水果製成嘅極簡配方零食，向加工食品界宣戰。

由農夫市集賣到上飛機證明消費者唔再當水魚

品牌創立初期並非一帆風順，Lior選擇由最貼地嘅農夫市集起步，直接面對消費者測試市場反應。點知產品大受歡迎，證明大眾早已厭倦成分複雜嘅「化學零食」。憑住良好口碑，「That’s it.」成功入選超市推廣計劃，逐步打入大型零售通路，之後更陸續進駐Target、Starbucks等知名連鎖店。隨著品牌越做越大，銷售網絡更擴張至Costco、Walmart等巨頭，甚至連美國航空嘅航班上都見到佢嘅蹤影，真正由地面賣到上天空，年收入直線飆升。

年賺7.8億堅拒風投主導只為守住一個簡單初衷

隨著品牌爆紅，目前年收入已衝破1億美元（約7.8億港元），成為水果零食市場嘅奇蹟！唔少投資者想分一杯羹，但Lior喺過程中一直刻意避免由風險投資（VC）主導，堅持要維持營運自主性，確保公司唔會為咗短期利益而偏離初衷。佢強調，品牌會一直堅守以1至5種成分製成嘅極簡標準，即使市場多次建議佢哋推出更高利潤嘅蛋白棒等產品，佢都一一拒絕，專注返喺天然水果呢個核心定位，守住當初想畀大眾食到真正水果嘅簡單夢想。