富士山酒店入夜後更精彩？期間限定「螢火蟲祭」登場錯過要再等一年！

去日本旅行，不少人揀酒店都指定要有「富士山景」，貪佢夠經典，日頭望住打卡呃like一流！不過講真，一到夜晚，富士山黑麻麻一片，所謂嘅絕景房即刻大打折扣，感覺有啲唔抵。但原來有間富士山腳嘅溫泉酒店，入夜後先係戲肉，精彩程度隨時勁過日頭！

富士山腳秘境酒店期間限定螢火蟲祭

位於山梨縣富士吉田市嘅溫泉酒店「鐘山苑」，本身就坐擁超大日式庭園，而庭園內更有桂川流過。每年初夏，呢度就會變成螢火蟲嘅聚集地，上演一場大自然嘅燈光騷！酒店就捉緊呢個時機，由6月5日至27日舉辦期間限定嘅「螢火蟲祭」，特別喺每晚8點到8點45分設置觀賞時段，等住客可以近距離欣賞到成千上萬螢火蟲喺身邊飛舞嘅夢幻場景，絕對係畢生難忘嘅體驗！

歎盡抹茶和菓子再聽小提琴演奏會

以為淨係得睇螢火蟲咁簡單？少年你太年輕了！酒店為咗令成個體驗升級，簡直係落足本錢。喺傍晚時份，住客可以先享用酒店準備嘅抹茶、日式傳統和菓子同甜美嘅無酒精甘酒，為夢幻一夜預熱。到咗晚上，庭園嘅涼亭仲會有小提琴現場演奏，喺浪漫樂聲同點點螢光包圍下，氣氛滿分！酒店更貼心提供浴衣租借服務，就算係新手都可以即刻著上身，一秒融入傳統祭典氣氛，影相打卡呃like冇難度！