寵物意外真係令人心都痛埋！最近菲律賓有隻僅10個月大嘅牡丹鸚鵡，本身活潑可愛，點知慘遭貓貓毒口，從此失去飛行同走路能力，令主人心痛不已。為咗令愛鳥重拾飛翔嘅快樂，主人諗到一個驚人方法，但呢個睇落超有愛嘅舉動，竟然引嚟專家發出警告？

主人心痛愛鳥慘失飛行能力奇招用無人機打造專屬頭等艙

事緣喺去年9月，呢隻名叫Nitya嘅10個月大牡丹鸚鵡，慘遭一隻貓貓從背後偷襲咬傷，導致腰椎嚴重受損，從此無法再行走或飛翔。主人Marc Joseph Colando眼見愛鳥失去生存樂趣，心痛之餘決定出奇招！佢竟然諗到利用無人機，並喺機身下方加裝一個鑽滿氣孔嘅塑膠罐，為Nitya度身訂造一個「飛行客艙」，帶住佢喺公園上空盤旋，希望幫佢重溫昔日喺天空中自由飛翔嘅感覺。

暖心舉動暗藏危機獸醫急發警告隨時好心做壞事

事件曝光後，正當大家可能都覺得主人超有愛心之際，呢個暖心舉動卻引來專業人士嘅關注。有獸醫就睇唔過眼，急急發出警告，提醒鳥類飼主如果打算進行類似活動，必須要三思而後行。獸醫指出，呢類做法有機會對雀鳥嘅健康或情緒造成不良影響，即使表面睇落無異樣，亦可能令寵物承受巨大壓力，隨時好心做壞事。

主人堅稱鸚鵡樂在其中專家提醒切勿胡亂模仿

雖然有專家提出質疑，但主人Colando就堅稱，佢嘅安排並無對Nitya造成任何傷害，仲話由影片可見，Nitya喺「飛行」過程中表現冷靜，睇落似乎非常享受重返天空嘅感覺。不過，獸醫方面就再次強調，任何飼主喺嘗試呢類非一般嘅活動前，都應該先諮詢獸醫或動物專家嘅意見，確保做法絕對安全，各位寵主切勿胡亂模仿！