養寵物真係每日都有驚喜！最近有位外國狗主喺討論區出Post，話屋企隻金毛尋回犬「曬得太黑」，搞到成身黑晒，問網民點樣「補救」。相片一出即刻引起哄動，皆因相中嘅狗狗唔係曬黑，而係一身純黑發亮嘅毛髮，同大家認知中嘅金毛尋回犬完全係兩回事，令唔少人睇到O晒嘴，高呼「呢隻色唔科學啊」！

主人搞笑求救金毛尋回犬曬到變黑炭

事緣一位外國飼主喺論壇Reddit上載咗一張相，相中嘅狗狗一身漆黑光滑嘅毛髮，望落非常帥氣。主人就幽默配文：「我隻金毛喺太陽下曬得太耐，有冇人知點補救？」呢隻名叫芬尼根（Finnegan）嘅狗狗，因為獨特嘅外型，隨即喺網上爆紅。唔少人初時都估計，芬尼根可能係另一品種「平毛尋回犬」（Flat-Coated Retriever），但主人隨後嘅爆料就令所有人都大跌眼鏡。

網民群起洗版笑指係影分身兼改名影子尋回犬

事件曝光後，大批網民湧入留言區食花生，留言區即時被洗版！有人搞笑咁建議主人：「呢隻烤得太焦啦，下次記得要翻面啊！」亦有網民笑指芬尼根根本就係金毛尋回犬嘅「影分身」。由於佢一身黑到發亮嘅毛色，網民更索性幫佢改個新朵，封佢為「影子尋回犬（Shadow Retriever）」，可以話係非常有型！

DNA報告揭驚人身世98%純種金毛竟因2%基因出事

面對全網嘅好奇同猜測，主人終於公開芬尼根嘅「身世之謎」！一份基因檢測報告結果顯示，芬尼根竟然擁有高達98%嘅金毛尋回犬血統，而剩低嘅2%則係嚟自黑色拉布拉多。專家解釋，原來狗狗嘅毛色遺傳並唔係簡單嘅顏色混合，而係由顯性基因主導。黑色拉布拉多嘅黑色基因（B）對金毛嘅黃色基因（e）有絕對優勢，所以就算芬尼根有98%金毛血統，嗰區區2%嘅黑拉基因，就足以令佢「全黑化」，變成一隻著住黑色西裝嘅金毛，呢場有趣嘅誤會亦成功令芬尼根成為網絡明星！