農夫紅館演唱會｜成立「老字號」即場切燒豬 Twins麥玲玲驚喜現身嗨爆全場

Q: 還有什麼演唱會消息？

無論是本地歌手還是外地歌手都即將在香港舉行演唱會，即睇： 演唱會時間表及購票資訊 ，包括 MIRROR演唱會門票兌換安排 、 容祖兒 、 鄭秀文 、 張學友 、 鄭中基 、 溫拿 、 羅志祥 等。

Q: 除了演唱會，還有什麼消閒娛樂活動？

喜愛宅在家的話，觀看 Netflix劇集 和 BL劇 最好不過。如果喜歡外出走走的你，也可到這些 室內好去處 室內遊樂場、溜冰場、自助烘焙店等盡玩室內活動。想要親親大自然，也可到離島走一走，即睇： 離島行程攻略 或是行山，這些 行山好去處 路線簡易，新手也適合。

陸永同C君以「全香港最好笑嘅演唱會」之名，為7,000名紅館觀眾帶來一場笑到碌地嘅極致舒壓派對，加上麥玲玲化身Hip Hop Queen、Twins驚喜現身合唱經典，成晚高潮叠起，笑聲掌聲歌聲響徹紅館，堪稱近年最癲最爽嘅演唱會體驗。

農夫開場自嘲升降台最平引爆全場

演唱會一開始，農夫二人以「只露個頭」嘅方式從耕地佈置中現身，即刻引爆第一個笑彈。陸永抵死笑言：「全香港最好笑嘅演唱會呀嘛，最好笑係呢度㗎啦，你哋張飛咁平，我哋個升降台係升到呢度㗎。」C君即刻接力自嘲：「其實係好事嚟，因為我下身唔係好好睇，我老婆都唔睇㗎。」全場爆笑聲未落，二人隨即「砰」一聲由升降台飛彈而出，氣氛瞬間推上第一個高潮，觀眾全體站立跟住一連串Hip Hop Medley由頭唱到尾，紅館即時化身巨型派對現場。

麥玲玲變身Hip Hop Queen嗨爆紅館

有農夫就當然少不了麥玲玲！今次農夫更請來當今香港Hip Hop界重量級代表Novel Fergus及Hip Hop詩人PetPet Shawn，加上玄學天后麥玲玲驚喜化身「Hip Hop Queen」登台獻技。玲玲大師一升台，全場瞬間進入狂歡狀態，掌聲、歡呼聲、尖叫聲交織成一首「人聲交響樂」，成為全晚最出人意料嘅驚喜環節之一，觀眾完全冇諗過會見到呢個組合，反應極之熱烈。

農夫成立「農作天下」七千人齊剪綵

演唱會中段農夫重磅宣布2025年已成立公司「農作天下」，上演一場7,000人參與嘅「剪綵開將」儀式。C君自豪笑稱：「呢間公司作為行業老字號，早喺2025年已經成立。」陸永加碼爆料：「成立短短九個月，公司佔地幾百呎，已經增設咗電動垃圾桶，佢仲識自己包垃圾㗎！」二人更笑指準備邀請古天樂、梁朝偉、周潤發簽約加盟，C君一本正經表示：「不過仲未去傾過。」全場即時笑到「噴飯」，之後佢哋更落台帶領全場觀眾齊齊為新公司切燒豬、剪綵，場面荒謬得嚟又溫馨。

張繼聰以「人夫集團」身份驚喜現身

緊接開將儀式，「農作天下」宣布十月會有新搞作，送俾所有結咗婚嘅人——由人妻集團呈獻，農夫x張繼聰組成「人夫集團」！張繼聰即以「人夫集團」身份驚喜現身，與農夫換上罕見西裝合唱《我連婚都夠膽結》，三位人夫同台演出畫面極之搞笑，全場再度點燃高潮，現場熱血沸騰，觀眾high到炸裂，掌聲歡呼聲此起彼落。

Twins驚喜升台合唱《士多啤梨蘋果橙》

未待掌聲停下，唱《學海無涯》時Twins竟然從舞台升出，與農夫合唱經典金曲《士多啤梨蘋果橙》，觀眾情緒瞬間「進入大癲」！陸永向剛新婚嘅阿Sa連聲恭喜，阿Sa笑住回應：「多謝多謝….我哋頭先喺台下面睇好high呀，好好笑！」C君即笑言：「話咗你哋fan meeting搵我做MC，你要還㗎啦！」阿Sa打趣道：「估唔到咁快要還嘛！」全場笑聲不絕。二人又大讚阿嬌專程飛返香港撐場極有義氣，C君更搞笑補刀：「你知唔知，我幾多朋友知我哋開紅館特登走呀，重係移民嗰種！」最後Twins衷心祝福：「農夫好嘢，繼續支持佢哋。」

容祖兒俞琤丁子高等眾星到場支持

除咗台上嘉賓陣容強大，台下同樣星光熠熠。容祖兒、俞琤、丁子高、hotcha Crystal、Lolly Talk、JFFT等均有到場支持農夫紅館首演，可見農夫喺圈中人緣極好。成晚由《富甲天下》開場到《舉高隻手》大合唱落幕，合共30首經典作品輪番上陣，農夫用行動證明「全香港最好笑」既笑得瘋狂、玩得盡興，更真心滿載，為出道廿年交出一張完美成績單。