時尚嘅嘢你真係識條鐵咩？最近時裝界又一「驚世」傑作震撼網民眼球！德國平價超市Lidl竟然踩過界，聯乘紐約設計工作室，將平平無奇嘅超市手推車，搖身一變成為最新款單肩包，仲要大搖大擺咁登上倫敦時裝周T台，前衛到令人O嘴嘅設計，瞬間引爆網上熱話！

神還原超市手推車造型細節位跟到足

呢款「購物車手袋」由德國平價超市Lidl同紐約設計工作室Nik Bentel Studio聯手打造，設計上可以話係「原汁原味」！整個手袋採用不鏽鋼網格製成，完美複製超市手推車嘅經典外型，連車身輪廓同把手都跟到足。最抵死嘅係，手袋上仲附有一個硬幣鑰匙扣，可以直接扣喺超市真正嘅手推車上，設計師呢種一本正經地搞笑嘅反差感，真係睇到人哭笑不得，唔少人驚嘆：「諗得出都算你勁！」

實用性近乎零被網民鬧爆：裝銀仔都漏！

事件曝光後，大批網民替個袋嘅實用性感到擔憂，更引發群組洗版！皆因手袋採用超大網格設計，基本上除咗個「寂寞」，可以話乜都裝唔到。有網民大呻：「放支唇膏、一串鎖匙入去，行兩步就跌晒出嚟啦！」、「呢個係智商稅產品？」、「買條蔥都裝唔到！」當中更有網民突破盲點，留言狠批：「時裝聯乘都算，但可唔可以揀間貴啲嘅超市…」一句話完美KO，引嚟過萬人讚好。

設計師親解反差感原意成功製造話題贏盡曝光

雖然被網民鬧爆唔實用，但其實呢款手袋嘅重點從來都唔係收納。設計工作室解釋，呢個設計最大嘅特色就係幽默感同反差效果。由品牌營銷角度睇，呢次聯乘無疑係一次極級成功嘅示範。試諗下，無論你喺街上、超市定係社交平台見到呢個袋，都好難忍住唔望多兩眼，甚至影相分享。最終，呢款「購物車手袋」雖然未必裝到嘢，但就成功為品牌裝到滿滿嘅話題同曝光率，贏盡全球目光。